Mannréttindadómstóll Evrópu (MDE) hefur fallist á að taka til efnislegrar meðferðar kæru Magnúsar Guðmundssonar, fyrrverandi bankastjóra Kaupþings í Lúxemborg, sem var sakfelldur fyrir aðild að markaðsmisnotkun og umboðssvik í svokölluðu Markaðsmisnotkunarmáli Kaupþings í Hæstarétti árið 2016.

Með sakfellingunni var dómi héraðsdóms snúið við að hluta en þar var tveimur ákæruliðum á hendur honum vísað frá dómi en hann sýknaður af öðrum ákærum.

Kæra Magnúsar byggir á því að Ingveldur Einarsdóttir og Þorgeir Örlygsson, dómarar við Hæstarétt, hafi verið vanhæf til að fella dóm á mál hans vegna starfa sona þeirra. Sonur Ingveldar var aðstoðarsaksóknari hjá Sérstökum saksóknara og sonur Þorgeirs var yfirlögfræðingur hjá slitastjórn Kaupþings.

Í niðurstöðu MDE um Al Thani-málið var komist að þeirri niðurstöðu að hæfi dómarans Árna Kolbeinssonar hefði ekki verið hafið yfir vafa en sonur hans starfaði fyrir bankann bæði fyrir fall hans og eftir að hann varð gjaldþrota.

Í kæru Magnúsar er einnig byggt á hlutafjáreign dómara í föllnu bönkunum og vísað til Viðars Más Matthíassonar, Ingveldar Einarsdóttur, Ólafs Barkar Þorvaldssonar og Markúsar Sigurbjörnssonar.

Ekki er vitað til þess að aðrir í hópnum en Ingveldur hafi átt hlutabréf í Kaupþingi fyrir fall bankans. Af niðurstöðu MDE í Al Thani-málinu má draga þá ályktun að dómarar verði ekki taldir vanhæfir í málum sem vörðuðu aðra banka en þá sem þeir áttu fjárhagslega hagsmuni í og að þeir hagsmunir hafi þurft að vera umtalsverðir.

Niðurstaða um meðferðarhæfi kæru Magnúsar var birt á vef MDE 22. júní síðastliðinn. Þegar hefur verið kveðinn upp áfellisdómur í máli Elínar Vigfúsdóttur vegna hlutafjáreignar dómara í Landsbankanum og í Al-Thani málinu eins og áður sagði.

Fleiri íslensk mál um hlutafjáreign dómara bíða meðferðar í Strassborg.