Margir muna eftir Mazda RX7 og RX8 sportbílnum með Rotary vélum en framleiðslu þeirra var hætt, ekki síst vegna mikillar eyðslu vélanna og talsverðs viðhalds. Mazda hefur þó aldrei alveg gefist upp á þessari velartækni og sífelldar fréttir hafa verið að frekari þróun Mazda á Rotary tækninni en uppbygging vélarinnar er talsvert frábrugðin hefðbundnum brunavélum. Nu heyrast þær raddir að Mazda hugi að bíl eða bílum sem munu aftur fá Rotary vélar. Þróun Mazda á vélinni hefur leitt til þess að hún þykir aftur eftirsóknarverð og svo vel hefur Mazda tekist til að eyðsla hennar er orðin minni en í hefðbundnum brunavélum.

Reynist afar hagkvæm í rekstri

Í viðtali sem bílablaðamaður ástralska bílatímaritsins Drive tók við Ichiro Hirose yfirmann vélasmíði Mazda á bílasýningunni í Genf fyrir nokkrum dögum kom fram að fyrirhuguð þróun Rotary vélar sem „range extender“ hafi breyst yfir í það að vera hugsuð sem aðalvél einhverra bíla Mazda. Ný Rotary vél þeirra hafi reynst svo hagkvæm í rekstri að bjóða mætti hana á öllum mörkuðum þar sem hún myndi standast allar kröfur um bæði eyðslu og mengun, hversu strangar sem þær væru. Því mætti búst við bílum frá Mazda á næstu árum með Rotary vélar og þá líklega fyrst í heimalandinu Japan og í Ástralíu, en vonandi svo sem víðast um heiminn. Ef til vill er því Rotary vélin ekki alveg dauð úr öllum æðum, en einn helsti kostur hennar er fólginn í miklu afli frá litlu sprengirými.