Mat­væla­stofnun boðar hertar sótt­varnir vegna fugla­flensu sem heldur á­fram að breiðast víða um heim, m.a. í Evrópu.

Í til­kynningu frá stofnuninni segir að tölu­verðar líkur séu á að hún berist hingað með far­fuglum. Fugla­eig­endur þurfi því að undir­búa sig undir hertar reglur um sótt­varnir, af­leiðingar smits á stórum ali­fugla­búum séu mjög al­var­legar.

Af­brigði fugla­flensu­veiru með mikla mein­virkni hefur fundist í fjöl­mörgum villtum fugla­tegundum í Evrópu á síðustu mánuðum og jafn­framt borist inn á ali­fugla­bú. Þetta á meðal annars við í löndum þar sem far­fuglarnir okkar hafa vetur­setu eða við­komu á leið til landsins. Í ljósi þessa er talin tölu­verð hætta á að veiran berist hingað.

„Fyrstu farfuglarnir koma um og upp úr miðjum febrúar og því mikilvægt að fuglaeigendur undirbúi sig undir að verja fuglana sína eins og kostur er. Ef veiran berst inn á alifuglabú og aðra staði þar sem fuglar eru haldnir getur fjöldi fugla drepist og óhjákvæmilegt verður að aflífa alla aðra fugla á viðkomandi stöðum til að hindra útbreiðslu veirunnar. Smithætta fyrir fólk er talin mjög lítil en þrátt fyrir það er ávallt rétt að gæta smitvarna við handfjötlun á veikum og dauðum fuglum," segir í tilkynningunni.

Matvælastofnun mun leggja til við Svandísi Svavarsdóttur, heilbrigðisráðherra, að fyrirskipa hertar sóttvarnir frá miðjum febrúar.

Munu leggja það til að fuglar verði aflífaðir

Ef skæð fuglaflensa greinist í alifuglum eða öðrum fuglum í haldi mun Matvælastofnun leggja til við ráðherra að fyrirskipa aflífun á öllum fuglum á viðkomandi stað til að hindra útbreiðslu veirunnar. Á stærstu alifuglabúunum eru tugir þúsunda fugla og er því ljóst að um mjög erfiðar aðgerðir yrði að ræða og gífurlegt tjón. Það er því til mikils að vinna að tryggja smitvarnir eins og kostur er.

Fuglaeigendur sem verða varir við sjúkdómseinkenni, aukin dauðsföll eða minnkun í áti skulu tafarlaust hafa samband við eigin dýralækni eða Matvælastofnun.

Almenningur er beðinn um að tilkynna til Matvælastofnunar ef villtir dauðir fuglar finnast, nema augljóst sé að þeir hafi drepist af slysförum. Best er að tilkynna með því að skrá ábendingu á vef stofnunarinnar, en einnig er hægt að hringja í síma 530-4800 á opnunartíma eða senda tölvupóst á netfangið mast@mast.is.

Á vef Matvælastofnunar má finna nánari upplýsingar um fuglaflensu, viðbúnaðarstig og fleira.