Að minnsta kosti 135 einstaklingar létu lífið þegar gríðarleg sprenging varð við hafnarsvæði Beirút, höfuðborgar Líbanons, á þriðjudaginn. Yfir fimm þúsund eru slösuð og að auki er hundraða enn saknað sem er vísbending um að tala látinna hækki enn frekar þegar frá líður.

Gríðarlegur skortur er á sjúkragögnum auk þess sem laskað heilbrigðiskerfi landsins ræður illa við þann fjölda sem þarf aðhlynningu þegar í stað. Evrópusambandið og fjölmörg lönd, þar á meðal Bretland, Tyrkland og Rússland, brugðust hratt við og sendu mannskap og hjálpargögn til landsins.

Enn er á huldu hvað olli sprengingunni í vörugeymslunni en í gær var greint frá því að þar hefðu um 2.750 tonn af ammoníumnítrati verið geymd undanfarin sex ár. Hefur sú staðreynd valdið mikilli reiði meðal almennings í Líbanon.

Forseti Líbanons, Michel Aoun, hefur heitið því að einhverjir verði dregnir til ábyrgðar fyrir meðferðina á hinu stórhættulega efni og muni hinir sömu þurfa að þola þyngstu mögulegu refsingu. Þá hefur yfirmaður tollamála í Líbanon, Badri Daher, greint frá því að hann hafi sent sex minnisblöð til stjórnvalda um hættuna sem gæti skapast af geymslu efnisins á þessum stað án þess að gripið hafi verið til aðgerða.

Hringurinn utan um hina meintu sökudólga þrengist því hratt en greint hefur verið frá því að nokkrir stjórnendur hafnarinnar í Beirút sæti nú stofufangelsi á meðan málið verður rannsakað.

Ljóst er að sprengingin hrikalega í Beirút er afar þungt högg fyrir þjóð sem mátti ekki við miklum áföllum í viðbót. Efnahagsástandið í Líbanon hefur verið afar bágborið undanfarin misseri og landið í raun rambað á barmi fjárhagslegs hengiflugs.

Aðeins er tæpt ár síðan þáverandi forsætisráðherra Líbanons, Saad Hariri, sagði af sér embætti eftir mótmælaöldu í landinu. Litlu mátti muna að styrjaldarástand brytist út því að lögregla og her voru sökuð um að hafa beitt óhóflegu valdi til þess að kveða niður hörðustu mótmælin.

Í tvo mánuði var ekki starfhæf ríkisstjórn í landinu en þá var Hassan Diab skipaður forsætisráðherra nýrrar stjórnar. Diab var háskólakennari sem einnig hafði gegnt embætti menntamálaráðherra en til þess að lægja öldurnar í landinu var ríkisstjórn hans skipuð sérfræðingum sem stjórnmálaflokkar höfðu lagt blessun sína yfir.

Það dugði þó ekki til þess að lægja öldurnar meðal almennings því mótmæli hafa verið tíð það sem af er ári. Eins og heimsbyggðin öll hefur Líbanon átt fullt í fangi með að glíma við kórónaveirufaraldurinn.

Alls hafa 65 dauðsföll verið skráð í landinu en áhrif faraldursins eru ekki síst efnahagsleg, enda treystir Líbanon mjög á ferðaþjónustu.

Hassan Diab