Matvælastofnun hefur óskað eftir rannsókn lögreglu á hugsanlegu smygli á hundi til landsins. Þá fer stofnunin einnig fram á rannsókn á hvatningu til ólöglegs innflutnings á hundum. Þetta kemur fram í tilkynningu frá MAST.

Hjalti Andrason, upplýsingafulltrúi MAST, segir mjög takmarkaðar upplýsingar hægt að gefa upp um málið að svo stöddu. Engin sambærileg mál hafi komið upp nýlega. Ítrekar hann að um að sé ræða hugsanlegt smygl.

Fréttablaðið hefur greint frá því að skortur sé á hundum í landinu og færri fá en vilja.

Samkvæmt upplýsingum á vef MAST má gera ráð fyrir undirbúningur vegna innflutnings hunda til Íslands taki frá nokkrum vikum til allt að 6 mánaða. Eingöngu er heimilt að flytja hund til íslands frá viðurkenndu útflutningslandi. Þá er bannað að flytja inn hvolpafullar tíkur, dýr sem hafa slasast eða undirgengist aðgerðir fyrir innflutning og blendinga af úlfum og hundum í a.m.k. 10 ættliði.