Þeir sem líklegastir þykja innan þingflokks Sjálfstæðisflokksins til að vera í aðalhlutverkum í fyrirhuguðum breytingum í ríkisstjórn eftir tilkynningu Sigríðar Á. Andersen um afsögn í gær eru Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra og varaformaður Sjálfstæðisflokksins, Áslaug Arna Sigurbjörnsdóttir, formaður utanríkismálanefndar Alþingis og ritari flokksins, Haraldur Benediktsson, oddviti flokksins í Norðvesturkjördæmi, og Bjarni Benediktsson, formaður flokksins.

Þórdís líklegust

Af þessum þykir Þórdís líklegust til að taka að sér dómsmálin. Bjarni gæti því þurft að setja annan í hennar stað í iðnaðar- og nýsköpunarráðuneytið og kemur Haraldur Benediktsson sterklega til greina.

Samkvæmt heimildum Fréttablaðsins hefur sú hugmynd hins vegar einnig verið rædd að Þórdís víki ekki úr því ráðherraembætti sem hún gegnir heldur muni aðrir sitjandi ráðherrar létta undir með henni og taka jafnvel að sér einhverja þeirra málaflokka sem hún fer með en um nokkra umfangsmikla málaflokka er að ræða, til að mynda orkumálin þar sem þriðji orkupakkinn er einna fyrirferðarmestur.

Áslaug Arna Sigurbjörnsdóttir hefur líka verið sterklega orðuð við dómsmálin, en þrátt fyrir ungan aldur þykir hún hafa staðið sig vel, bæði í formennsku þingnefnda og í forystuhlutverki sínu í flokknum.

Þá gæti Bjarni einnig ákveðið að taka dómsmálin sjálfur tímabundið á meðan mál eru að skýrast varðandi nýfallinn dóm Mannréttindadómstólsins. Hann er hins vegar sjálfur með þung mál á sinni könnu; ekki síst meðan kjaraviðræður eru ekki til lykta leiddar.

Breyting í einu eða tveimur skrefum

Val Bjarna stendur því milli þess að gera fyrst bráðabirgðabreytingu á ráðherraliði sínu og bíða með varanlegri breytingu eða taka nýjan mann inn í ríkisstjórn. Margir eru um hituna í þingflokki Sjálfstæðisflokksins og ljóst að Bjarni getur ekki gert öllum til geðs.

Þótt Katrín Jakobsdóttir forsætisráðherra hafi lagt áherslu á jöfn kynjahlutföll í ríkisstjórninni, herma heimildir blaðsins að Bjarna hafi ekki verið settir neinir úrslitakostir í þeim efnum.

Ríkisráðsfundur síðdegis

Ljóst er að nýr dómsmálaráðherra sest í ríkisstjórn í dag en ríkisráðsfundur hefur verið boðaður klukkan fjögur síðdegis þar sem Sigríði Andersen verður veitt lausn frá embætti dómsmálaráðherra Hún mun sitja sinn síðasta ríkisstjórnarfund í bili sem hefst klukkan níu í dag.

Vantraust frá Alþingi vofði yfir

Þótt Sigríður hafi komist þannig að orði á blaðamannafundi í gær að hún hygðist stíga tímabundið til hliðar til að skapa vinnufrið um eftirmál dóms Mannréttindadómstólsins, er alls óvíst að hún eigi afturkvæmt í ríkisstjórn. Heimildir Fréttablaðsins herma að henni hafi verið nauðugur þessi eini kostur vegna þrýstings frá ráðherrum og þingmönnum Vinstri grænna. Hafi hún átt þann kost að stíga til hliðar eða hætta á að fá á sig vantraust frá Alþingi. Sjálfstæðismönnum hafi verið gert ljóst að engu yrði að treysta um atkvæði þingflokks VG í atkvæðagreiðslu um vantraust.

Töluverð andstaða mun einnig vera í VG við endurkomu Sigríðar í ríkisstjórn fyrr en í fyrsta lagi að gengnum nýjum dómi frá Strassborg. Bið eftir honum getur tekið marga mánuði eða ár.