Rósa Björk Brynjólfsdóttir, þingmaður Vinstri grænna,  telur að íslenska ríkið hefði átt að una dómi Mannréttindadómstóls Evrópu í Landsréttarmálinu svokallaða. Greint var frá því í gær að Mannréttindadómstóll Evrópu hefði metið íslenska ríkið hafa brotið lög við skipun Landsréttardómara. Sigríður Á Andersen dómsmálaráðherra steig til hliðar vegna málsins í dag. Rósa fjallar um málið á Facebook síðu sinni þar sem hún segir gríðarlega þarft að dómsmálaráðherra hafi ikið úr embætti og tekið þar með ábyrgð á „klúðurslegum embættisfærslum sínum sem hafa valdið mikilli óvissu á dómsstiginu og í réttarkerfinu.“ 

Þá segir Rósa Sigríði ekki njóta trúnaðar og að ekkert sé að marka tal hennar um að stíga til hliðar á meðan óvissu sé eytt. „Annaðhvort er fólk ráðherrar eða ekki. Það er líka mjög gott að forsætisráðherra hafi skipað öflugan sérfræðingahóp lögfræðinga til að fara yfir stöðuna sem nú ríkir og til að skila fljótt tillögum til að Landsréttur verði starfhæfur aftur og hægt sé að svara því hver verða afdrif dóma Landsréttar, hvort afplánanir frestist eða ekki, hvort og þá hvernig beri að skipa á ný í Landsrétt svo að sátt ríki og traust aukist. Það er grundvallaratriði í heilbrigðu lýðræðisríki að ein af undirstöðum þess - réttarríkið - virki fyrir borgarana,“ ritar Rósa. 

Sem fyrr segir telur hún að íslenska ríkið hefði átt að una dómi MDE. Kveðst henni finnast slæmt að Bjarni Benediktsson, fjármála- og efnahagsráðherra, leyfi sér að „fara inn á mjög varasamar brautir í viðbrögðum sínum við dómi MDE til að planta inn efasemdum um dómstólinn og kasta rýrð á hann.“

Að loknum blaðamannafundi spurði fjármálaráðherra hvort Ísland hefði framselt túlkunarvald yfir íslenskum lögum til Evrópu og sagði niðurstöður MDE oft verið umdeildar. „Höfum við framselt túlkunarvald yfir íslenskum lögum til Evrópu?“ Spurði Bjarni. 

Rósa Björk gagnrýnir orð Bjarna harðlega og segir Evrópusambandið og Mannréttindadómstól Evrópu ekki vera einn og sama hlutinn. „Þetta er ekki ESB gott fólk, heldur varð Ísland aðili að Evrópuráðinu 1950, við erum í gegnum það aðilar að Mannréttindasáttmála Evrópu sem er ein mesta réttarbót þegar kemur að mannréttindum sem Ísland hefur undirgengist og við þarmeð viðurkennt að hafi lagagildi á Íslandi. Sáttmálinn hefur til að mynda rík túlkunaráhrif á mannréttindaákvæði stjórnarskrár Íslands og dómar Hæstaréttar hafa leitast við að túlka mannréttindaákvæði stjórnarskrárinnar í samræmi við ákvæði Mannréttindasáttmálans. Mannréttindadómstóll Evrópu var stofnaður árið 1959 á grundvelli Mannréttindasáttmálans og tryggir að aðildarríki Evrópuráðsins virði þau réttindi borgaranna sem kveðið er á um í sáttmálanum.“ Ritar Rósa og heldur áfram: 

„Það sem er mikilvægast er að borgarar í aðildarríkjum Evrópuráðsins geta leitað til dómstólsins telji þeir að stjórnvöld hafi beitt þá órétti. Um það snýst þetta mál sem dæmt var í gær og öll önnur mál fyrir dómnum. Ef dómstóllinn telur að ríki hafi brotið gegn ákvæðum sáttmálans þá dæmir hann í málinu. Það gerðist í gær. Og okkur, sem aðildarríki Evrópuráðsins og lýðræðisríki sem ber virðingu fyrir mannréttindum, ber skylda til að fara eftir úrskurðum hans. Berum áfram virðingu fyrir mannréttindum og þeim skuldbindingum sem við höfum undirgengist. Gagnvart öllum borgurum, líka fólki á flótta sem hingað koma til að leita verndar okkar. Og þó að Sjálfstæðisflokkurinn þurfi að fórna einum ráðherra, þá gröfum við ekki undan þeim mikilvægu skyldum okkar sem eru miklu stærri og mikilvægari en eitt stykki ráðherradómur.“