Tímaritið MAN, sem gefið hefur verið út af útgáfufélaginu Mantra ehf frá árinu 2013, hefur hætt útgáfu. Desember tölublað tímaritsins, þar sem Eliza Reid forsetafrú prýddi forsíðuna, var síðasta tölublað útgáfunnar. Þetta kemur fram í tilkynningu frá útgáfunni.
„Það er auðvitað sárt að þurfa að hætta útgáfu þess sem að okkar mati hefur verið eitt vandaðasta tímarit landsins en sökum erfiðs rekstrarumhverfis sjáum við þá leið eina færa,“ segir Auður Húnfjörð, framkvæmdastjóri útgáfunnar, í tilkynningunni, en félagið var rekið af henni og Björk Eiðsdóttur, ritstjóra blaðsins.
„Þó svo að tímaritið hafi fengið frábærar móttökur eru aðstæður til slíkrar útgáfu hér á landi, á þessum litla markaði, því miður nánast ómögulegar og fara síst batnandi. Við höfum frá degi eitt haft allt undir og reynt að láta reksturinn ganga upp, með því að vinna sjálfar allt það sem við gátum og skera niður þar sem hægt er án þess að það bitni á gæðum. Við alla vega reyndum allt sem við gátum og göngum að því leyti sáttar frá borði, þó svo að þetta sé ekki sársaukalaust,“ segir Björk.
