Héraðsdómi Reykjavíkur hefur verið gert að taka aftur fyrir frávísunarkröfu Jóns Baldvins Hannibalssonar, fyrrverandi ráðherra, í máli sem varðar meint kynferðisofbeldi gegn Carmen Jóhannsdóttir. Málinu var vísað frá í héraðsdómi þann 7. vanúar en áfrýjað til Landsréttar.
Í úrskurði Landsréttar er bent á að úrskurður hafi verið kveðinn upp meira en fjórum vikum eftir að málflutningur fór fram. Samkvæmt lögum á að flytja málið aftur við slíkar aðstæður nema dómari og aðrir aðilar telji það óþarft.
Í úrskurði Landsréttar kemur fram að málið hafi ekki verið flutt að nýju og að það verði ekki ráðið að aðilum máls hafi verið gefinn kostur á því. Þá segir að þeir hafi ekki lýst því yfir að ekki væri þörf á því og að dómari væri því sammála.
Vegna þess er úrskurðurinn ómerktur og málinu vísað aftur til héraðs í munnlegan málflutning og uppkvaðningu úrskurðar.
Jón Baldvin var ákærður fyrir kynferðisbrot, með því að hafa laugardaginn 16. Júní 2018 á heimili sínu á Grenada á Spáni, strokið utanklæða upp og niður eftir rassi Carmen, sem var gestkomandi á heimili Jóns.
Carmen krafði hann um eina milljón í miskabætur og Jón Baldvin krafðist frávísunar og málsvarnarlauna úr ríkissjóði.
