Í dag heldur Vegagerðin áfram að fræsa og malbika Suðurlandsveginn og á Hellisheiðinni. Í dag á að fræsa báðar akreinar til vesturs, um 2,1 kílómetra kafla á milli vegamóta við Þrengslaveg og Litlu Kaffistofunnar. Akreinunum verður lokað á meðan og færð á öfugan vegarhelming. Áætlað er að vinnan standi til klukkan 19 í kvöld.

Þá á einnig að malbika báðar akreinar á um tveggja kílómetra kafla á Hellisheiði til vesturs, vestan við Hellisheiðarvirkjun. Þar þarf einnig að loka akreinunum á meðan og því verður umferð beint úr hringtorgi á Hveragerði um Þrengslin. Áætlað er að þessari vinnu ljúki ekki fyrr en um miðnætti.

Á sunnudagskvöldið hefjast framkvæmdir við brúna við Ölfusá, hún verður opin á mánudag en frá mánudagskvöldi verður hún lokuð í viku. Gangandi vegfarendur munu þó geta komist um brúnna á meðan viðgerð stendur.

Þingvallavegur er enn lokaður og verður það þar til í október. Hjáleið er um Vallaveg. 

Nánari upplýsingar um lokanir vega er hægt að nálgast á heimasíðu Vegagerðarinnar.