Raðir hafa myndast við eftirlitsstöðvar á landamærum Brasilíu og Venesúela eftir að hinn umdeildi Nicolás Maduro, forseti Venesúela, fyrirskipaði að landamærunum yrði lokað. Ástæðan eru deilur um erlend hjálpargögn. BBC greinir frá. 

Maduro tilkynnti um lokunina seint í gærkvöldi í ríkissjónvarpi Venesúela þar sem hann sagðist einnig vera að íhuga að loka landamærum við Kólumbíu. Hann hefur neitað öllum ásökunum um að kreppa sé í landinu og segir allar hjálparbirgðir sem berast til landsins séu hluti af sýningu skipulagðri af bandarískum stjórnvöldum.

Juan Guaidó, sem lýst hefur sjálfan sig sem starfandi forseta landsins, er á leiðinni að landamærum Kólumbíu til þess að tryggja hjálpargögnum verði komið til þeirra sem á þurfa. Síðar í dag verða haldnir styrktartónleikar fyrir Venesúela í Kólumbíu. Á sama tíma mun stjórn Maduro halda tónleika nokkur hundruð metrum frá.