Katrín Jakobsdóttir, formaður Vinstrihreyfingarinnar – grænt framboð, segist halda ákveðinni hefð í kringum kjördag en þetta eru sjöttu alþingiskosningarnar þar sem hún er í framboði. „Fyrir mér er þetta rosalega hátíðlegur dagur því það er svo mikilvægt að fara að kjósa,“ segir hún.
„Það er alltaf góður morgunmatur svo maður endist út daginn,“ segir Katrín. „Svo er það að fara á milli kosningaskrifstofa og hitta fólk. Auðvitað byrja ég samt á því að fara að kjósa og svo fara í þennan rúnt. Svo tek ég alltaf smá hlé áður en kvöldhasarinn byrjar.“
Í kvöld ætlar Katrín að verja tímanum sínum í Iðnó ásamt flokksfélögum sínum en hún mun líka heimsækja bæði Stöð 2 og Rúv.
„Svo fer ég bara heim. Ég sofna yfirleitt snemma. Maðurinn minn vekur mig ef það er eitthvað mjög mikilvægt að gerast. Svo tek ég bara stöðuna þegar ég vakna,“ segir Katrín.
Katrín segist vera mjög spennt fyrir kvöldinu og hefur haft gaman af deginum fram til þessa. Það var aldeilis nóg um að vera hjá henni á kosningakaffinu og átti blaðamaður í erfiðleikum við að ná af hana tali þar sem hún var umkringd fólki.
„Við erum annars vegar að tala við fólk sem er búið að kjósa og er bara að koma og fá sér kaffi og köku en svo eru aðrir sem eru enn óakveðnir,“ segir Katrín.
Þá segir Katrín vera mjög ánægð með þá góðu kjörsókn sem hefur verið fram til þessa, bæði í dag og í utankjörfundaratkvæðagreiðslum. „Mér finnst svo öfundsvert að búa í landi þar sem er svona góð þátttaka,“ segir hún.
