Karlmaður var í nótt stunginn til bana í Ólafsfirði. Fjórir einstaklingar hafa verið handteknir vegna málsins og njóta þeir allir réttarstöðu sakbornings.

Þetta kemur fram í tilkynningu frá lögreglunni á Norðurlandi eystra. Þar er því lýst að klukkan 02:34 í nótt hafi verið óskað eftir aðstoð lögreglu, þar sem maður hafði verið stunginn með eggvopni.

Lögreglumenn og sérsveitarmenn frá Akureyri hafi haldið á staðinn og lögreglumenn á bakvakt á Tröllaskaga voru einnig ræstir út. Fram kemur að þegar fyrstu lögreglumenn komu á vettvang, voru endurlífgunartilraunir hafnar á manninum sem var með áverka. Læknir og sjúkraflutningamenn komu einnig á vettvang en endurlífgunartilraunir báru ekki árangur og var maðurinn úrskurðaður látinn á vettvangi.

Líkt og áður segir voru fjórir aðilar handteknir í þágu rannsóknar málsins og njóta þeir allir réttarstöðu sakborninga á fyrstu stigum málsins og meðan aðkoma þeirra að málinu er rannsökuð. Enginn er eftirlýstur vegna málsins.

Þá segir að rannsókn málsins sé í höndum lögreglunnar á Norðurlandi eystra sem nýtur aðstoðar tæknideildar lögreglunnar á höfuðborgarsvæðinu.

„Rannsókn málsins er á algjöru frumstigi og mikil vinna lögreglu framundan. Vegna rannsóknarhagsmuna er því ekki hægt að veita frekari upplýsingar um það að svo komnu. Ákvörðun um hvort farið verður fram á gæsluvarðhald yfir einhverjum sakborninganna verður tekin seinna í dag.“ segir í tilkynningu lögreglu.

Uppfært - 13:24

Í fyrri útgáfu fréttarinnar var haft eftir RÚV að einn þeirra handteknu hefði haft í hótunum við hinn látna. Það reyndist ekki vera rétt. Sá sem hótaði honum er ekki í haldi lögreglu.