Hópslags­mál urðu í Hólagarði í Breið­holti á fimmta tímanum í dag og voru fjórir lög­reglu­bílar kallaðir út vegna málsins. Sjónar­vottar segja tvo menn hafa verið að slást og ógna ung­mennum á svæðinu. Vitni að slags­málunum sagði lík­legt að annar mannanna hafi verið undir á­hrifum fíkni­efna.

„Við heyrðum börn gráta og sáum tvo menn takast á, annar þeirra virtist vera reyna að slást við börnin sem voru mjög skelkuð,“ segir starfs­maður Af­rozone í sam­tali við Frétta­blaðið. Starfs­maðurinn taldi þó víst að enginn hafi slasast al­var­lega eftir á­tökin.

Hlaut sár á hendurnar

Lög­regla kvaðst ekki geta tjáð sig um málið og vildi ekki stað­festa hvort hópslags­mál hafi farið fram eður ei. Vitni segja fjóra lög­reglu­bíla hafa mætt á svæðið eftir að slags­málin höfðu verið leyst upp. „Þeir komu þegar þetta var allt búið.“

Vitni sem kom á vett­vang að slags­málunum lokið sagði rúðu hafa verið brotna og að lög­regla hafi tekið skýrslu af fólki á svæðinu. „Lög­reglan var að ræða við ungan pilt sem hafði greini­lega verið að reyna að stöðva á­tökin.“

Þá var ljóst að ungi maðurinn sem lög­reglan ræddi við hafi hlotið á­verka við að reyna að stöðva á­tökin. „Hann var með sár á höndunum sem blæddi úr,“ benti vitni á í sam­tali við Frétta­blaðið. Ekki er vitað hvort ungi maðurinn hafi þurft að leita á sjúkra­hús vegna á­verkana.

Vitni segja ungmenni á svæðinu hafa verið skelkuð eftir atburðinn.
Fréttablaðið/Ernir