Félag fréttamanna hefur sent frá sér stuðningsyfirlýsingu við þá blaða- og fréttamenn sem lögreglan á Akureyri hefur boðað til yfirheyrslu og veitt stöðu sakbornings vegna umfjöllun þeirra um svokallaða „skæru­liða­deild­“ Sam­herja.

Í gær var greint frá því að Aðalsteinn Kjartansson blaðamaður á Stundinni, Þórður Snær Júlíusson ritstjóri Kjarnans, Þóra Arnórsdóttir ritstjóri Kveiks, og Arnar Þór Ingólfsson blaðamaður á Kjarnanum hefðu verið boðuð í yfirheyrslu vegna umfjöllunar þeirra um svokallaða „skæru­liða­deild­“ Sam­herja og að þau hefðu stöðu sakbornings í málinu.

Í yfirlýsingu Félags fréttamanna er lýst yfir undrun og áhyggjum yfir því að lögreglan skuli kalla blaða- og fréttamenn til yfirheyrslu og veita þeim stöðu sakborninga vegna starfa þeirra við blaðamennsku.

Málavextir séu enn óljósir en að þau séu grunuð um brot gegn friðhelgi einkalífsins, vegna þess að þau hafi skrifað fréttir unnar upp úr gögnum sem sýndu samskipti fólks tengdu Samherja, sem sjálft hafi kallað sig skæruliðadeild.

„Dómar Hæstaréttar og Mannréttindadómstóls Evrópu hafa á undanförnum árum staðfest rétt íslenskra blaðamanna og nauðsyn þess að þeir vinni fréttir úr gögnum sem þeim berast, eigi þau erindi við almannahagsmuni. Þá ber blaðamönnum ótvíræð lagaleg skylda til að vernda heimildarmenn sína, hvort sem þeir hafa veitt upplýsingar með lögmætum eða ólögmætum hætti,“ segir einnig í yfirlýsingunni.

„Blaða- og fréttamenn víða um heim búa við síauknar ógnanir og ofsóknir, bæði af völdum stjórnvalda, skipulagðra glæpasamtaka og stórfyrirtækja. Tveir blaðamenn hlutu á síðasta ári friðarverðlaun Nóbels, fyrir baráttu sína fyrir fjölmiðlafrelsi í löndum sínum.

Í rökstuðningi dómnefndarinnar kom fram, að frelsi fjölmiðla til að miðla staðreyndum og réttum upplýsingum væri forsenda lýðræðis og friðar í ríkjum heims. Ísland hefur á undanförnum árum fallið niður lista samtakanna Reporters Without Borders vegna bágrar stöðu fjölmiðla hér, nú síðast niður í 16. sæti, meðal annars vegna þess að Samherji „skipulagði herferð árið 2020 til að varpa rýrð á blaðamenn sem fjallað höfðu um fréttamálið (um athæfi fyrirtækisins í Namibíu)“.“

Að lokum kemur fram í yfirlýsingunni að Félag fréttamanna lýsi yfir stuðningi við blaða- og fréttamennina sem um ræðir.