Lyfjastofnun og Tollgæslan tóku þátt í umfangsmikilli aðgerð Europol, Operation Shield III, þann 19. desember í fyrra. Það kemur fram í tilkynningu frá Lyfjastofnun í dag en hérlendis var meðal annars lagt hald á steratengd efni, stinningarlyf, og sterk verkjalyf eins og oxíkontín.
Alls tóku tuttugu og átta ríki þátt í aðgerðinni sem stóð yfir frá apríl til október á síðasta ári, með samvinnu lögreglu, tollyfirvalda og lyfjastofnana auk ýmissa fjölþjóðlegra stofnana. Tollgæslan og Lyfjastofnun tóku þátt í aðgerðinni hérlendis og nutu aðstoðar tengslafulltrúa Íslands hjá Europol.
349 handteknir
Í tilkynningu Lyfjastofnunar segir að Europol hafi stýrt alþjóðlegu aðgerðinni Operation Shield III en hún beindist gegn ólöglegum lyfjum og steratengdum efnum.
Hald var lagt á lyf að andvirði rúmlega 40 milljóna evra á heimsvísu, fimmtíu og níu glæpahópar voru leystir upp, og tíu ólöglegum rannsóknarstofum lokað. Hérlendis var meðal annars lagt hald á steratengd efni, stinningarlyf, og sterk verkjalyf eins og oxíkontín.
Enn freista alþjóðleg glæpasamtök þess að hagnast á COVID-19 faraldrinum, en athyglin sem beinist að öllu sem honum tengist, gerir að verkum að á brattann er að sækja. Stjórnvöld sem buðu borgurum landa sinna ókeypis bólusetningu gerðu glæpamönnum t.d. óhægt um vik að koma sviknum efnum á framfæri.
Nánari upplýsingar er að finna á vef Europol en þar kemur, meðal annars, fram að 349 hafi verið handteknir og tíu ólöglegum rannsóknarstofum lokað og að lögreglan hafi afvopnað um 59 skipulagða glæpahópa.
Nánar hér á vef Lyfjastofnunar og Europol.
