Lögreglan á höfuðborgarsvæðinu vísar algjörlega á bug ummælum í frétt Morgunblaðsins og mbl.is í morgun þar sem hún er sökuð um að hafa í hótunum við rekstraraðila veitingastaða í miðborginni, en í fyrirsögn fréttarinnar er lögregla sögð mistúlka reglur og beita hótunum.

Í frétt Morgunblaðsins er rætt við Er­lend­ Þór Gunn­ars­son, hæsta­rétt­ar­lögmann, sem er lögmaður fjölda rekstr­araðila í miðborg­inni. Segir hann að dæmi séu um að lögregla sé að koma rétt fyr­ir klukk­an tíu á kvöld­in inn á veitingastaði að hóta sekt­um þar sem ör­fá­ir sitja og eru að klára að borða eða drekka drykki sína. Reglurnar kveði þó á um að gestir skuli hafa yfirgefið staðina eigi síður en klukkustund eftir að þeir loka klukkan tíu, s.s. klukkan ellefu. Þá segir að í nokk­ur skipti hafi komið til snarpra orðaskipta milli eig­enda og lög­regluþjóna.

Samskipti verið með ágætum

Í tilkynningu frá lögreglunni segir að við eftirlit í miðborginni starfi lögregla samkvæmt túlkun heilbrigðisráðuneytisins á reglugerð um takmörkun á samkomum vegna farsóttar. Þar sem og annars staðar hafi lögreglan beitt meðalhófi. Lögreglumenn hafi einnig lagt sig fram um að leiðbeina veitingamönnum um það sem betur má fara, séu ástæður til þess. Samkvæmt lögreglunni hefur ábendingunum verið vel tekið og samskiptin verið með ágætum.

Svo virðist sem að reglurnar sem eru í gildi séu túlkaðar mismunandi.

„Vegna fréttarinnar er enn fremur ástæða til að ítreka að opnunartími veitingastaða þar sem heimilaðar eru áfengisveitingar skv. 1. mgr. 5. gr. reglugerðarinnar sé til klukkan tíu en þá eiga staðirnir að vera tómir, enda sé þessum stöðum ekki heimilt að hleypa inn nýjum viðskiptavinum eftir klukkan níu. Þá skal „take away“ þjónusta fara fram í gegnum lúgu eða hurð eftir klukkan níu en slík þjónusta er heimil til klukkan ellefu samkvæmt reglugerðinni;" segir í tilkynningu frá lögreglunni á höfuðborgarsvæðinu.