Lögreglan á landsvísu fékk alls 2.374 tilkynningar um heimilisofbeldi og ágreining á milli skyldra eða tengdra einstaklinga árið 2022. Um er að ræða tæplega 12% aukningu samanborið við síðustu þrjú ár þar á undan og hefur fjöldi tilkynninga aldrei verið meiri.
Þetta kemur fram í nýrri skýrslu ríkislögreglustjóra sem birt hefur verið á vef lögreglunnar.
Beiðnir um nálgunarbann voru 118, eða svipaðar að fjölda og síðastliðin 3 ár á undan. Alvarlegustu heimilisofbeldismálin, þar sem lífi og heilsu árásarþola var ógnað endurtekið eða á alvarlegan hátt, voru 102 talsins árið 2022 sem er svipaður fjöldi og síðustu ár.
„Heimilisofbeldi er skilgreint sem ofbeldi sem einstaklingur verður fyrir af hendi nákomins, þ.e. árásaraðili og árásarþoli eru skyldir, tengdir eða hafa sögu um tengsl og eru tilvikin ekki bundin við heimili fólks. Útköll lögreglu þar sem ekki er grunur um brot eru skráð sem ágreiningur á milli skyldra og tengdra. Mikilvægt þykir að skrá bæði ágreining og heimilisofbeldi til að fá heildstæða mynd af tilvikum og hvort tilvik leiði til ítrekaðra og alvarlegri atvika,“ segir á vef lögreglu.
Í skýrslunni kemur fram að þegar eingöngu er litið til heimilisofbeldismála, að er tilvika þar sem grunur er um brot á borð við líkamsárásir, hótanir eða eignaspjöll, þá voru tilvikin 1.086, eða 3% fleiri en árið 2020 í miðjum heimsfaraldri. Tilkynningar um ágreining milli skyldra/tengdra aðila voru 1.288 talsins, eða 23% fleiri en árið 2021.
Í 78% tilvika heimilisofbeldis var árásaraðili karl og í 67% tilvika var brotaþoli kona. Þegar horft er til tilvika heimilisofbeldis þegar um er að ræða ofbeldi milli maka eða fyrrum maka eru 80% árásaraðila karlar og 77% brotaþola eru konur.
Um 2/3 málanna eru gegn maka eða fyrrverandi maka og um fimmtungur varðar foreldra og börn, ótengd aldri barns.
Skýrsluna má finna hér.
