Logi Einarsson, formaður Samfylkingarinnar, segist gáttaður vegna umfjöllunar Fréttablaðsins frá því í dagað ríkið krefjist nú sýknu af öllum bótakröfum Guðjóns Skarphéðinssonar sem sýknaður var af aðild að hvarfi Geirfinns Einarssonar í fyrra þegar sakfellingardómi Hæstaréttar frá 1980 var snúið við.

„Þessi ósvífni er á ábyrgð ríkisstjórnarinnar,“ segir Logi í færslu sem hann birtir á Facebook-síðu sinni í kvöld. Þar deilir hann einnig frétt Fréttablaðsins, sem má sjá hér að neðan.

Eðlilegt að fallast á bótaskyldu

Logi segir háttalag ríkisstjórnarinnar „hreint ótrúlegt“ gagnvart mönnum sem hafi verið sýknaðir af glæpum sem þeir liðu „gríðarlegar þjáningar“ fyrir „bæði í hræðilega langri einangrun í varðhaldi og með afplánun langra dóma.“

Logi segir að aðilar að dómsmálum leggi línum um málsvörn og segir að það hefði verið eðlilegt af ríkinu, í það minnsta, að fallast á bótaskyldu, þó að einhver ágreiningur væri um fjárhæðir.

„Það getur ekki verið hlutverk þeirra sem fara með opinbert vald að beita öllum brögðum til að fá sýknu heldur þarf að gæta einnig virðingar og sanngirni gagnvart borgurunum. Í þessu máli fara ráðherrar með fyrirsvar og ábyrgðin á þessari framgöngu því þeirra,“ segir Logi og bætir við:

„Ef ég hef einhvern tímann verið gáttaður þá er það vegna þessarar fréttar“.

Færslu Loga má sjá hér að neðan.