Slökkviliðið á höfuðborgarsvæðinu er enn að störfum við Hvaleyrarbraut 39 við að ná niðurlögum elds sem kom upp í gærkvöldi. Búið er að slökkva eldinn að mestu, þó enn logi í glæðum, þá helst til í kjallara hússins.

Eyþór Leifsson, varðstjóri hjá slökkviliðinu á höfuðborgarsvæðinu, segir í samtali við Fréttablaðið að um sé að ræða stórt og mikið hús og unnið sé að því að hindra aðgang súrefnis að glæðunum. „Það eru enn glæður og rýkur úr þessu en við höldum áfram. Við gefumst ekkert upp og þetta hefst að lokum,“ segir Eyþór.

Eyþór segir húsið að mestu leyti ónýtt en ómögulegt er að segja á þessari stundu hve mikið tjónið er í raun. Lögreglan í Hafnarfirði hefur lokað svæði í kringum húsið og vinnur að því að halda óviðkomandi aðilum frá vettvangi.