Engar nýjar upplýsingar liggja fyrir í leit að hvítabirni á Melrakkasléttu. Þyrla Landhelgisgæslunnar sneri aftur til baka til Akureyrar klukkan hálf eitt í nótt. Lögregla fer yfir stöðuna nú í morgun.

Lögreglunni á Norðurlandi eystra barst tilkynning um að sést hafi til hvítabjarnar á sjöunda tímanum í gærkvöld. Leitað var til Landhelgisgæslunnar sem flaug þyrlu yfir svæðið í leit að birninum. Lögreglumenn voru einnig sendir á svæðið ef á þyrfti að halda.

 Þá var send tilkynning með smáskilaboðum á alla farsíma á svæðinu og fólk beðið að láta vita ef það yrði vart við dýrið. Leit hefur þó ekki borið árangur, en líkt og fyrr segir sneri þyrla Landhelgisgæslunnar aftur til baka til Akureyrar í nótt, þegar ekki hafði sést til dýrsins. Lögregla fer nú yfir stöðu mála og endurmetur hana.