Reynsluakstur – Lexus ES 300h

Snemma á þessu ári kynnti Lexus á Íslandi Lexus ES 300h bílinn en hann hefur aldrei áður fengist hérlendis, né heldur í Evrópu allri. Hann hefur nefnilega hingað til eingöngu verið á boðstólum í Bandaríkjunum, Rússlandi og í Asíu. Það var sannarlega kominn tími á að kynna þennan fágaða bíl fyrir kaupendum í Evrópu í samkeppninni við bíla eins og BMW 5, Audi A6 og Mercedes Benz E-Class sem eru svipaðrar stærðar. Ef til vill má segja að þessi bíll sé djarflegast teiknaður af þeim öllum. Hér er sannarlega kominn bíll fyrir augað, bíll sem stendur út úr fjöldanum og er hugsanlega einn fegursti Lexus sem fá má nú um stundir að mati greinarritara. 

Eins og með flesta aðra Lexus bíla nú er ES með risastórt grill, en það bara gerir sig svo vel á þessum bíl og framendinn er afar flottur. Það á þó reyndar við allan bílinn, fagrar línur og samsvörun leika um hann og þar sem hann virkar að auki svo langur verður hann tignarlegur á götu. Mikið hrós til hönnuða Lexus og þeir halda áfram að gera vel inní bílnum. Þar er glæsileikinn alltumlykjandi og ber að auki mögnuðum handverksmönnum Lexus gott vitni. Eins og fyrri daginn virðist allt svo vel smíðað hjá þeim og það sannast yfirleitt í könnunum um áreiðanleika þar sem Lexus trónir svo til alltaf hæst. Þeir bara bila ekki og það færir kaupendum hugarró.

Handverksmenn Lexus engum líkir

Þegar sest er inní Lexus ES 300h fer ekkert á milli mála að hér fer lúxusbíll, sætin er frábær og rafstillanleg, en þegar maður fer að fikta í tökkunum þá sést að þau eru ekki einungis hitanleg, heldur kælanleg líka. Það gefur smá tóninn. Mælaborðið er líka sérdeilis huggulegt og efnisval og hönnun til fyrirmyndar. Ferlega flottur og stór 12,7 tommu aðgerðaskjár er fyrir miðju þess og þar má finna gott leiðsögukerfi, Apple CarPlay og stjórna raunverulega flestu í bílnum. Bak við stýrið er svo óhefðbundinn mælir, en ekki hraða- og snúningsmælir, sem segir ökumanni strax að þarna fer Hybrid bíll sem ætlað er að fara sparlega með eldsneytið og það gerir hann sannarlega. Oftast fylgir þessu markmiði lítt skemmtilegur akstursbíll, en það á sko alls ekki við hann þennan. 

En nánar að eyðslu bílsins. Hann er með uppgefna 4,4 lítra eyðslu, sem er náttúrulega með ólíkindum fyrir svo stóran lúxubíl. Greinarritari sannfærðist þó um að það væri hægt því í köldum og snævi klæddum reynsluakstrinum reyndist hann oftast með innan við 6 lítra eyðslu við frísklegan akstur. Geri aðrir betur! Uppgefin mengun er svo aðeins 103 g CO2 og það eru góðar fréttir er kemur að verði, því fyrir vikið fellur hann í hagstæðan vörugjaldsflokk.

Fágun umfram ofurafl

Eina aflrásin sem er í boði í Lexus ES 300h samanstendur af 2,5 lítra bensínvél og tveimur rafmótorum sem saman skila 218 hestöflum til framhjólanna. Ekki mikill hestaflafjöldi, en hann er heldur ekki hugsaður sem spyrnukerra heldur bíll sem fer hrikalega vel með ökumann og farþega og skín af fágun og það skært. Bíllinn er þó langt í frá að vera neinn letingi því sprettinn í 100 tekur hann á 8,4 sekúndum. Aldrei finnst reyndar fyrir aflleysi á bílnum, en þeir sem kjósa spyrnukerrur ættu að leita annað. En að akstri Lexus ES300h. 

Til að vera nú sem beinskeyttastur í orðum í samburðinum á þessum bíl og keppinautum hans þá er það svo að BMW 5, Audi A6 og Mercerdes Benz E-Class færa meira fjör í aksturinn, en þessi Lexus ES 300h rassskellir þá alla í fágun, lúxus, þægindum í akstri, lágri eyðslu og rekstrarkostnaði, svo ekki sé nú minnst á bilanatíðni og endursöluverði. Glæný gerð fjöðrunar sem Lexus segir að enginn annar bjóði virkar frábærlega og fer, eins og áður segir, hrikalega vel með ökumann. Því er ef til vill ekki endilega hægt að mæla með F-Sport útgáfu ES með stífari fjöðrun og minni fágun. Aksturinn og upplifunin í þessum bíl er eitthvað svo ljúf og mér fannst ég stundum vera „chauffeur“ forsetans, enda ekur hann á Lexus. Eini ókosturinn við akstur bílsins er hávaði frá vélinni þegar henni er gefið vel inn, en það á við fleiri Lexus og Toyota bíla.

Öruggasti bíllinn í sínum flokki

Lex­us ES er hlaðinn staðal­búnaði. Þar má nefna árekstr­ar­viðvör­un­ar­búnað, ak­reinavara, árekstr­ar­vara, sjálf­virk­an hraðastilli og um­ferðaskilta­grein­ingu, enda fékk hann ný­lega 5 stjörn­ur fyr­ir ör­yggi hjá Euro NCAP-rann­sókn­ar­fyr­ir­tæk­inu og var út­nefnd­ur ör­ugg­asti bíll­inn í flokki stærri fólks­bíla og í flokki tvinn- og raf­magns­bíla. Mikið pláss er bæði í farþega- og far­ang­urs­rýminu en Lex­us ES hef­ur besta fóta­rými bíla í þess­um flokki. Lex­us ES er fá­an­leg­ur í fjór­um út­færsl­um, Com­fort, Ex­ecuti­ve, F Sport og Lux­ury og kost­ar frá 7.910.000 kr. sem verður að teljast ágætasta verð fyrir svo tignarlegan bíl. Í Luxury-útfærslu er hann þó kominn uppí 10.060.000 kr.

Kostir: Útlit, rými, smíðagæði, öryggi, verð

Ókostir: Hávaði vélar í inngjöf, ekkert vélarval

2,5 lítra bensínvél og rafmótorar, 218 hestöfl 

 Framhjóladrif  

 Eyðsla: 4,4 l./100 km í bl. akstri 

 Mengun: 103 g/km CO2 

 Hröðun: 8,9 sek. í 100 km hraða 

 Hámarkshraði: 180 km/klst 

 Verð frá: 7.910.000 m kr. 

 Umboð: Lexus í Kauptúni