Aðeins 26 króna munur reyndist á vörukörfu sem innihélt 17 vörur í verðkönnun sem ASÍ gerði og hefur birt. Bónus var með lægsta verðið en Krónan nánast á pari. Nettó reyndist ekki nema ríflega 2 prósent dýrari en Bónus.

Samkvæmt tilkynningu frá ASÍ var mikill verðmunur í flestum tilfellum á þeim matvörum sem voru til skoðunar. „Oftast var yfir 40% verðmunur á hæsta og lægsta verði í könnuninni eða í 57 tilfellum af 107 en í 37 tilfellum af 107 var yfir 60% verðmunur á hæsta og lægsta verði.“

Í 20 tilfellum af 107 var verðmunurinn á milli hæsta og lægsta verðsins yfir 80 prósent. „Mestur var verðmunurinn á 200 stykkjum af kaffipokum nr. 4 eða 253% en í þessu tilfelli var tekið niður verð á ódýrustu tegundinni í hverri búð. Þá má nefna mikinn verðmun á bleyjum en mestur var verðmunurinn á Libero bleyjum nr. 2, 36 stk eða 51%. Ódýrastar voru þær í Bónus á 595 kr. en dýrastar í Iceland á 899 kr. Aðrir vöruflokkar þar sem verðmunur var mikill voru hreinlætisvörur, ávextir og grænmeti, kjöt og fiskur, sælgæti og snakk, þurrvörur, drykkjarvörur og barnavörur. “

Könnunin var gerð á sama tíma í öllum verslununum. Miðað var við hilluverð og afsláttur tekinn til greina ef hann sást á hillu.