Listi Vinstri grænna í Norðvesturkjördæmi var í dag samþykktur á fundi flokksins í Miðfirði í dag en Bjarni Jónsson, fiskifræðingur og sveitarstjórnarmaður, leiðir lista hreyfingarinnar í kjördæminu eftir að hann lenti í fyrsta sæti í prófkjöri flokksins síðastliðinn apríl.
Bjarni hafði þar með betur gegn þingmanni Vinstri grænna, Lilju Rafney Magnúsdóttur, sem er í öðru sæti listans. Samþykktur listi er í samræmi við niðurstöður prófkjörsins, þar sem Sigríður Gísladóttir er í þriðja sæti, Þóra Margrét Lúthersdóttir í því fjórða, og Lárus Ástmar Hannesson í fimmta.
Góð stemning
Á fundinum í dag sagði Bjarni að til framtíðar lægju miklir möguleikar í sterkara VG á sveitarstjórnarstiginu og samvinnu landsmálanna og sveitarstjórnarmálanna. Hann þakkaði ráðherrum VG fyrir mikla vinnu og framsækni þrátt fyrir að öll mál hafi ekki náðst í höfn á kjörtímabilinu.
Lilja Rafney sagði einnig að með gleði og samvinnu væri allt hægt og sagðist ætla að láta til sín taka í málefnum launafólks, sjómanna og byggðanna og fyrir réttlátara samfélagi með umhverfismál að leiðarljósi. Hún sagðist fyllast andagift yfir fjölbreytileikanum á listanum og þeirri góðu stemningu sem ríkti.
Guðmundur Ingi Guðbrandsson, varaformaður VG, var sérstakur gestur á fundinum, ræddi kosningabaráttuna fram undan og hvatti frambjóðendur og almenna félagsmenn til dáða. Nú verði áfram byggt á þeim góða grunni sem lagður hafi verið í ríkisstjórn, það verði byggt á samþykktum síðasta landsfundar, og horft fram á veginn og talað við fólkið í landinu.
Listi VG í Norðvesturkjördæmi:
- Bjarni Jónsson, fiskifræðingur og sveitarstjórnarmaður, Hólum í Hjaltadal
- Lilja Rafney Magnúsdóttir, alþingismaður, Suðureyri
- Sigríður Gísladóttir, dýralæknir, Ísafirði
- Þóra Margrét Lúthersdóttir, sauðfjár- og skógarbóndi, Forsæludal í Vatnsdal
- Lárus Ástmar Hannesson, kennari og bæjarfulltrúi, Stykkishólmi
- Heiðar Mar Björnsson, kvikmyndagerðarmaður, Akranesi
- Halldóra Lóa Þorvaldsdóttir, kennslustjóri og formaður byggðaráðs, Reykholti
- Ólafur Halldórsson, nemi og starfsmaður í aðhlynningu, Skagaströnd
- Dagrún Ósk Jónsdóttir, þjóðfræðingur, Strandabyggð
- María Hildur Maack, umhverfisstjóri, Reykhólum
- Auður Björk Birgisdóttir, háriðnmeistari og bóndi, Hofsósi
- Einar Helgason, smábátasjómaður og skipstjóri, Patreksfirði
- Brynja Þorsteinsdóttir, leiðbeinandi á leikskóla og varam. í sveitarstjórn, Borgarnesi
- Rún Halldórsdóttir, læknir, Akranesi
- Valdimar Guðmannsson, iðnverkamaður og eldri borgari, Blönduósi
- Guðbrandur Brynjúlfsson, bóndi, Brúarlandi á Mýrum
