Líneik Anna Sævarsdóttir Alþingismaður hefur tilkynnt um framboð sitt í 1. sæti Framsóknarflokksins í Norðausturkjördæmi.

Hún hefur verið Alþingismaður Norðausturkjördæmis árin 2013 til 2016 og 2017 til 2021, eftir að hafa starfað að sveitarstjórnarmálum frá 1998.

Hún hefur starfað í allsherjar- og menntamálanefnd, efnahags- og viðskiptanefnd, umhverfis- og samgöngunefnd, stjórnskipunar- og eftirlitsnefnd á Alþingi og í Íslandsdeild þingmannaráðstefnunnar um norðurskautsmál.

Þórunn Egilsdóttur, oddviti Framsóknarflokksins í Norðausturkjördæmi glímir við krabbamein og gefur því ekki kost á sér í ár. Auk Líneikar hefur Ingibjörg Ólöf Isaksen, bæjarfulltrúi á Akureyri, gefið kost á sér til forystu og þar hafa einnig verið nefndir Þórarinn Pétursson varaþingmaður og Jón Björn Hákonarson, bæjarstjóri Fjarðabyggðar.

Líneik Anna á heima á Fáskrúðsfirði í Fjarðabyggð þar sem hún hefur búið í aldarfjórðung, hún er uppalin á Fljótsdalshéraði en hefur auk þess búið um tíma á höfuðborgarsvæðinu og á Vesturlandi. Hún er gift Magnúsi Ásgrímssyni, saman eiga þau 4 börn á aldrinum 20-31 árs, auk tveggja barnabarna.

Líneik er líffræðingur með kennsluréttindi og hefur lengst af starfað við fræðslumál og stjórnun; við kennslu, verkefnastjórn og sem skólastjóri á Fáskrúðsfirði.

Meðal baráttumála hennar eru jafnrétti og jafnræði íbúa landsins og þar með góðar samgöngur, bæði í raunheimum og netheimum.

„Samgöngur eru lykill að tækifærum og árangri í samfélagsþróun. Sjálfbær nýting náttúruauðlinda er grundvöllur íslensks efnahagslífs og því þarf samspil manns og náttúru að vera viðvarandi viðfangsefni stjórnmálanna. Markvissar aðgerðir í umhverfismálum eru mikilvægar og þurfa að byggja á upplýstri umræðu. Líneik er tilbúin að fást á við öll þau verkefni sem samfélagið stendur frammi fyrir hverju sinni hvort sem það eru náttúruöflin, farsóttir eða eitthvað allt annað. Eitt stærsta verkefnið framundan er að fjölga störfum og styrkja atvinnulífið í kjölfar COVID 19," segir í framboðstilkynningu hennar.