Lilja Al­freðs­dóttir menningar­mála­ráð­herra sagði á Safna­þingi á Aust­fjörðum í síðustu viku að hún harmaði að hafa skipað Hörpu Þórs­dóttur sem þjóð­minja­vörð án aug­lýsingar. Lilja vísaði í skipan sinni til undan­þágu­á­kvæðis í starfs­manna­lögum sem heimilar til­færslu em­bættis­manna.

Ráð­herra sagði á Safna­þinginu eftir að gagn­rýni kom fram á störf hennar að hún hefði ekki staðið að skipaninni ef hún hefði vitað hvaða við­brögð yrðu í sam­fé­laginu. Um hundrað manns urðu vitni að yfir­lýsingunni og setti marga hljóða að sögn við­staddra.

„Lilju var mjög mikið niðri fyrir. Hún harmaði að hafa fært til em­bættis­mann í starfi með þessum hætti,“ segir Ólöf Gerður Sig­fús­dóttir, for­maður Ís­lands­deildar ICOM, al­þjóða­ráðs safna.

„Við upp­lifðum að hún sæi sannar­lega eftir þessu,“ bætir Ólöf Gerður við.

Fyrir þingið hafði Lilja varið skipan sína með því að Harpa hefði verið yfir­burða­hæf til að gegna stöðunni. Þá hafði safna­fólk notað orðið hneyksli um skipanina.

Í gær boðaði Lilja til fundar með for­mönnum þeirra fé­laga sem hafa sent frá sér harð­orðar yfir­lýsingar.

„Þetta var góður fundur, ráð­herra tjáði vilja til sátta. Hún getur ekki aftur­kallað skipanina sem hefði verið best strax í upp­hafi, en Lilja lýsti vilja til að vinna á­fram að mál­efnum allra höfuð­safnanna þriggja,“ segir Ólöf Gerður.

Þar á hún við Lista­safn Ís­lands, Náttúr­minja­safnið og Þjóð­minja­safnið.

„Það var á­kveðið að stofna sam­ráðs­hóp til að ræða fyrir­komu­lag, svo sem skipunar­tíma og aug­lýsingar við þessar þrjár stöður höfuð­safnanna.“

Einnig var á fundinum rætt hvort hægt væri að setja tak­mörk á ráðningar­tíma.

Í tveimur af þremur höfuðsafnanna er hægt að endur­ráða sama ein­stak­ling í æðstu stöðu for­stöðu­manns með ótakmörkuðum hætti.