Líkamsræktarstöðvar mega opna á morgun með ákveðnum takmörkunum. Svandís Svavarsdóttir heilbrigðisráðherra fundaði í dag með Þórólfi Guðnasyni sóttvarnarlækni um ákvæði sem gilda um íþróttir að líkamsrækt.

Þó að sóttvarnarlæknir hafi lagt til að líkamsræktarstöðvar skyldu lokaðar komst ráðuneytið að þeirri niðustöðu að hægt væri að halda þeim opnum þar sem hægt væri að uppfylla skilyrði um sóttvarnir.

„Niðurstaða ráðuneytisins var sú að ekki væri stætt á því að banna hreyfingu í líkamsræktarstöðvum þar sem unnt væri að uppfylla sömu skilyrði og gilda um íþróttastarf,“ segir í tilkynningu frá ráðuneytinu.

World Class hefur þegar auglýst hópatíma og er að fyllast í nánast alla.

Starfsemin þarf að rúmast innan þeirra takmarkana sem reglugerðin setur:

  • Öll blöndun hópa er óheimil í tengslum við salernisaðstöðu, búningaaðstöðu, inn- og útganga o.s.frv.
  • 20 manna hámarksfjöldi.
  • 2. metra nálægðarmörk.

Sóttvarnalæknir vinnur nú að gerð leiðbeininga til heilsuræktar- og íþróttastöðva á grundvelli reglugerðar heilbrigðisráðherra.

Ákvæði nýrrar reglugerðar um íþrótta- og heilsuræktarstarfsemi sem tekur gildi á morgun, þriðjudaginn 20. október en í reglugerðinni kemur fram:

„Íþrótta- og heilsuræktarstarfsemi sem krefst nándar, snertingar eða notkunar gólf-, loft- eða veggfasts sameiginlegs búnaðar og stórra tækja, svo sem í tækjasölum heilsuræktarstöðva, er óheimil. Notkun á öðrum sameiginlegum búnaði, svo sem handlóðum, hjólum eða dýnum, er heimil ef um er að ræða skipulagða hóptíma þar sem allir þátttakendur eru skráðir. Búnaður skal ekki fara á milli notenda í sama hóptíma og skal sótthreinsaður fyrir og eftir æfingu. Í húsnæði þar sem slík starfsemi fer fram gildir ákvæði 1. mgr. 3. gr. um fjöldatakmörkun.“

Svandís og Þórólfur funduðu í dag um líkamsræktarstöðvar.
Fréttablaðið/Anton Brink