Pelet­on líkams­ræktar­hjól Joe Biden, nýjasta for­seta Banda­ríkjanna, fær lík­legast ekki að fylgja honum í Hvíta húsið sökum á­hyggja af net­öryggis­málum vegna hjólsins. New York Times greinir frá málinu.

Í um­fjöllun miðilsins kemur fram að Pelet­on hjól for­setans sé af nýjustu gerð. Á því er því mynda­vél og hljóð­nemi, það er inter­net­tengt og býður not­endum upp á að eiga í sam­skiptum við aðra á sam­fé­lags­miðlum. Hjól Bidens kostar um 2500 Banda­ríkja­dollara eða því sem nemur rúmum 325 þúsund ís­lenskum krónum.

Biden tók við embætti í dag, líkt og alþjóð veit. Hann hefur nú þegar hafist handa við að snúa við ýmsum ákvörðunum sem forveri hans í starfi tók. Þannig er hann til að mynda þegar búinn að skrifa undir forsetatilskipun um endurkomu Bandaríkjanna í Parísarsáttmálann.

Segir í frétt miðilsins að CIA muni lík­legast vilja kíkja á hjól Biden áður en það verður flutt inn í ný húsa­kynni for­setans. Banda­ríska leyni­þjónustan CIA muni lík­legast gefa lítið fyrir að er­lend yfir­völd eigi mögu­leika á því að brjótast inn í hjól Banda­ríkja­for­seta og fylgjast með sam­skiptum hans þar.

Biden, sem er 78 ára gamall, leggur mikla á­herslu á líkams­rækt. Segir NYT að hann og eigin­konan, Dr. Jill Biden, hefji sér hvern dag á líkams­rækt, en þau eiga hjólið, auk lóða og hlaupa­brettis.

Peleton „skandallinn“ hefur þegar vakið töluverða athygli:

Segir í um­fjölluninni að tals­menn hins nýja for­seta hafi ekki svarað fyrir­spurnum miðilsins um málið. Manneskja sem sögð er náin for­setanum sagði miðlinum þó að Joe og Jill út­kljái það á hverjum morgni hver fær að nýta hjólið fyrst.

Biden er þó ekki fyrsti for­setinn sem átt hefur raf­magns­tæki sem CIA hefur haft á­hyggjur af. Þannig hafði leyni­þjónustan miklar á­hyggjur af iP­hone síma Donald Trump, for­vera Biden, en hann nýtti símann ó­spart til að hringja í gamla vini. Þá vildi Barack Obama fyrir alla muni nýta sér Black­Berry símann sinn í Hvíta húsinu og síðar iPad.

Haft er eftir Garrett Graff, sér­fræðingi net­öryggis­mála, að leyni­þjónustan þurfi á­vallt að bera virðingu fyrir þörfum for­seta en á sama tíma tryggja öryggi þeirra. „Ógnin er raun­veru­leg,“ segir hann um hjólið en að svo virðist vera sem hún sé þó við­ráðan­leg með góðum undir­búningi.

Að­dá­endur Pelet­on hjólanna eru þess full­vissir um að Biden muni ekki sætta sig við að skilja við hjólið, að því er New York Times hefur eftir þeim. „Enginn sem er trúr Peloton hjólinu sínu myndi flytja og ekki taka það með sér,“ segir Larry Appel, fyrr­verandi yfir­maður hjólaframleiðandans.

Richard H. Led­gett Jr, fyrr­verandi yfir­maður hjá banda­rísku þjóðar­öryggis­stofnuninni NSA, segir í sam­tali við NYT að ef hjólið eigi að fá að koma í Hvíta húsið, verði að fjar­læga mynda­vélina og hljóð­nemann. Hann segist auk þess myndu ráð­leggja Biden að stofna nýjan notanda með not­enda­nafn af handa­hófi í hverjum mánuði.

Auk þess ætti hjólið að vera fjarri þeim stöðum þar sem við­kvæm mál gætu verið rædd. „Ef hann er gaur sem hjólar og talar við fólk, þá gæti það orðið vanda­mál,“ viður­kennir Led­gett, sem viður­kennir að hann sé mikill Pelet­on að­dáandi sjálfur.

CIA þykir Peloton hjólin einum of snjallvædd fyrir sinn smekk.
Fréttablaðið/Getty