Sænskur maður á sextugsaldri er grunaður um að hafa tekið út lífeyri látins föður síns í sextán ár. Alls hafði maðurinn um 1,4 milljónir sænskra króna upp úr krafsinu og er hann nú ákærður fyrir fjársvik. Frá þessu greinir fréttamiðillinn SVT.
Í febrúar í fyrra barst lífeyrissjóði í Svíþjóð nafnlaus ábending um mann á tíræðisaldri sem enn var skráður á heimilisfang í borginni Eskilstuna, þrátt fyrir að hafa dáið fyrir mörgum árum.
Yfirvöld hófu að rannsaka málið og í kjölfarið var maðurinn boðaður á fund til að bera kennsl á sjálfan sig. Hann lét aldrei sjá sig.
Lést í Búkarest árið 2001
Eftir nánari eftirgrennslan fengu sænsk yfirvöld afrit af dánarvottorði mannsins frá sænska sendiráðinu í Búkarest, sem staðfesti að maðurinn hafði látist í Rúmeníu árið 2001.
Þrátt fyrir það hafði hann þegið lífeyrisgreiðslur frá árinu 2004 að andvirði 1,4 milljón sænskra króna, sem jafngildir rúmlega 18,5 milljónum íslenskra króna.
Hafði aðgang að reikningi pabba síns
Í ljós kom að sá sem sótti um lífeyri fyrir hönd mannsins var sonur hans, sem skráður var á sama heimilisfang og hafði prókúru fyrir föður sinn.
Málið var kært til lögreglu og er sonurinn nú ákærður fyrir fjársvik. Sænski lífeyrissjóðurinn hefur krafist skaðabóta að andvirði 750 þúsund sænskra króna fyrir greiðslur sem maðurinn fékk frá árinu 2012.
Þrátt fyrir að hafa einnig þegið greiðslur frá árunum 2004 til 2011 var ekki hægt að sækja manninn til saka fyrir fjársvik fyrir þann tíma þar sem það tímabil er fyrnt.
Neitar sök
Hinn ákærði neitar sök í málinu og sagðist við yfirheyrslur ekki muna hvort það hafi verið hann sem sótti um lífeyrinn. Spurður að því hver það annars geti hafa verið svaraði hann: „Kannski Guð.“
Réttarhöld fóru fram í vikunni í héraðsdómi Eskilstuna og er niðurstöðu að vænta eftir tvær vikur.
