Svan­dís Svavars­dóttir heil­brigðis­ráð­herra segir að nú sé verið að leita leiða með einka­aðilum til að manna vaktir á gjör­gæslu­deildum, bæði til að bæta mönnun og til að bæta við óþreyttu fólki. Þetta kom fram í viðtali við Svandísi í Fréttavaktinni á Hringbraut í gærkvöldi.

„Þetta eru aðilar sem eru að reka heil­brigðis­þjónustu úti í bæ en hafa tekið því vel þegar við höfum leitað eftir því að þau geti ljáð okkur lið, eða lagt okkur lið öllu heldur. Bæði læknar og hjúkrunar­fræðingar og fjöl­breyttara starfs­fólk, sem er að hjálpa okkur að manna þessar deildir sem mæðir mest á,“ sagði Svan­dís.

Spurð hvort það sé ekki úr takti við hennar pólitík sem hefur á­vallt talað gegn einka­væðingu heil­brigðis­kerfisins sagði Svan­dís að það sé í takt við hennar pólitík að leysa málin.

„Ef þetta er leiðin til þess, þá geri ég það,“ sagði ráðherrann. Það væri hluti af Co­vid-far­aldrinum að allir snúi bökum saman, bæði þau sem starfi innan opin­bera kerfisins og þau sem starfi í einka­kerfinu. Nefndi hún sem dæmi sam­starf opin­bera kerfisins og Ís­lenskrar erfða­greiningar sem hefur, meðal annars, gert heilbrigðiskerfinu kleift að rað­greina sýni.

„Við erum mjög ánægð með þetta,“ segir Anna Sigrún Baldursdóttir, aðstoðarmaður forstjóra Landspítalans, um fyrirkomulagið. „Þetta er samt ekki lausn á mönnunarvandanum, heldur aðeins hluti af viðbragði sem við höfum gripið til áður. Þetta eru aðilar sem við þekkjum og þekkja okkar starfsemi. Við höfum áður verið í samstarfi við þá í faraldrinum og gerum það núna aftur.“

Anna segir gríðarlegan skort vera á sérhæfðu starfsfólki eins og er á gjörgæslunni. Landspítalinn glími við sama vanda og aðrir um allan heim.

„Þegar maður er með kerfi sem keyrir á hundrað prósent afköstum alla daga gefur auga leið að þegar krafan um afköst verður meiri, eins og í heimsfaraldri, verður að vera hægt að bæta hratt og örugglega við. Þá er gott að eiga svona ágæta samstarfsaðila,“ segir Anna Sigrún.