Síðastliðinn sunnudag var erlendur karlmaður stöðvaður í Flugstöð Leifs Eiríkssonar vegna gruns um að hann hefði látið greipar sópa í fríhöfninni. Maðurinn átti bókað flug til London, að því sem fram kemur í fréttapósti frá lögreglustjóranum á Suðurnesjum. Var hann í kjölfarið handtekinn og fluttur á lögreglustöð. 

Í stórri íþróttatösku sem hann hafði meðferðis fannst ýmis varningur sem talinn var vera þýfi, svo sem átta karton af Malboro sígarettum, átta ilmvatnsglös, tvenn Bose quiet 35 ll heyrnartól og Hugo Boss fatnaður að verðmæti rúmlega 245 þúsund krónur.

Við skýrslutöku á lögreglustöðinni í Keflavik neitaði maðurinn öllum sakargiftum í fyrstu en kvaðst hafa keypt varninginn. Síðar í vikunni var svo tekin önnur skýrsla af honum og þá játaði hann þjófnaðinn á ofangreindum munum.