Tvær stúlkur, 11 og 12 ára, lent í vandræðum í Eyvindará á Egilsstöðum á sjötta tímanum í dag. Stúlkurnar, ásamt fjölda annarra, höfðu verið að stökkva í ána eins og tíðkast hefur á góðviðrisdögum. Fram kemur í tilkynningu frá Lögreglunni á Austurlandi að stúlkurnar hafi borist með straumi árinnar niður að flúð sem er neðar í ánni, þar lentu þær í sjálfheldu og þurftu foreldrar þeirra, ásamt nokkrum þeirra sem viðstaddir voru, að bjarga þeim upp úr ánni.

Stúlkurnar sluppu með skrekkinn og fóru heim til sín eftir skoðun hjá lækni.

Lögreglan á Austurlandi vill koma á framfæri ábendingu þess efnis að áin getur verið varasöm og sterkur straumur í henni sem fólk getur lent í vandræðum vegna. Mikið afrennsli er úr fjöllum á Austurlandi vegna hlýinda undanfarið og því áin vatnsmikil um þessar mundir.