Verkalýðsfélagið Hlíf segir stöðuna á leikskólum Hafnarfjarðar alvarlega vegna manneklu.

Félaginu barst bréf frá leikskólakennara, þar sem hann biður börn og foreldra afsökunar á því að geta ekki sinnt starfi sínu nógu vel.

Bréfið er undirritað af „leikskólakennara í Hafnarfirði“ og birtist nafnlaust á heimasíðu Hlífar með yfirskriftina „Afsakið“.

„Við starfsmenn leikskólans erum að sligast undan álagi vegna manneklu sem er vegna veikinda (fólk er að brenna út), vinnutímastyttingar og fjarveru leikskólakennara við umönnun/kennslu þar sem það kemur ekki afleysing vegna undirbúningstíma þeirra. Það eru of mörg börn á hvern starfsmann og of lítið rými fyrir börn og starfsmenn. (Eins og síld í tunnu),“ byrjar bréfið.

Leikskólakennarinn biður þar fjölmarga aðila afsökunar, þar á meðal börn, foreldra og samstarfsmenn.

Trúnaðarmenn Hlífarstarfsfólks segja misræmi á kjörum starfsfólks á leikskólum Hafnarfjarðarbæjar og þeirra sem starfa í nágrannasveitarfélögum. Tugir starfsmanna hafa hætt vegna þessa misræmis og ráðið sig í vinnu í nágrannasveitarfélögum.

Ég vil biðja litlu börnin afsökunar á að flýta mér að skipta á bleyjum og klæða þau í útiföt. Það er ekki tími til að spjalla eða setja orð á athafnir þar sem það bíða grátandi börn eftir þjónustu.

Afsakið

Við starfsmenn leikskólans erum að sligast undan álagi vegna manneklu sem er vegna veikinda (fólk er að brenna út), vinnutímastyttingar og fjarveru leikskólakennara við umönnun/kennslu þar sem það kemur ekki afleysing vegna undirbúningstíma þeirra. Það eru of mörg börn á hvern starfsmann og of lítið rými fyrir börn og starfsmenn. (Eins og síld í tunnu).

Þess vegna vil ég biðja börnin á leikskólanum afsökunar.

Mig langar að biðja barnið afsökunar sem ég gat ekki tekið í fangið og huggað eftir að það var bitið í handlegginn, vegna þess að ég þurfti að stoppa gerandann svo fleiri börn yrðu ekki bitin.

Ég vil biðja litla drenginn afsökunar sem ég gat ekki leyft að fara inn þegar honum var kalt – vegna þess að það var enginn starfsmaður inni. (Ég gat sett á hann nýja vettlinga og knúsað hann).

Eins vil ég biðja barnið afsökunar sem ég þurfti að klæða í drulluskítug og rök föt á mánudagsmorgni, ég hafði ekki fleiri föt til að lána.

Ég vil biðja litlu börnin afsökunar á að flýta mér að skipta á bleyjum og klæða þau í útiföt. Það er ekki tími til að spjalla eða setja orð á athafnir þar sem það bíða grátandi börn eftir þjónustu.

Mig langar líka að biðja hópinn minn afsökunar á að geta ekki klárað lestrarstundir/vinnustundir þar sem einn nemandinn tekur alla athygli (þyrfti stuðning).

Að lokum vil ég biðja foreldra afsökunar á að hafa lítinn tíma í spjall í lok dags, vegna fjölda barna í langri vistun og fárra starfsmanna seinni partinn.

Hvar er virðingin fyrir börnunum okkar? Hún sést ekki í launaumslaginu eða í vinnuaðstöðu okkar. Það er talað um á tyllidögum að við kennarar sinnum merkilegasta starfinu. En afsakið – það eru bara falleg orð á blaði.

Með afsökunarkveðjum

Leikskólakennari í Hafnarfirði.