Kristján Odds­son, svæðis­stjóri og fag­stjóri lækninga hjá heilsu­gæslunni í Hamra­borg, greindi frá því í kvöld­fréttum Stöðvar 2 að enn ætti eftir að rann­saka leg­háls­sýni sem voru tekin í byrjun nóvember en sýnin lágu ó­hreyfð í pappa­kassa vikum saman en um er að ræða rúm­lega tvö þúsund sýni.

Að því er kemur fram í frétt Vísis var málið til­komið vegna skorts á samningum en skimanir fyrir leg­háls­krabba­meini færðust yfir frá Krabba­meins­fé­laginu til heilsu­gæsla um ára­mótin. Krabba­meins­fé­lagið hætti þá að greina sýnin í nóvember.

Samkomulag náðist í dag

Í kjöl­farið hafi ekki náðst að undir­rita samninga við rann­sóknar­stofu í Dan­mörku sem myndi þá sjá um greiningu sýnanna, þar sem Land­spítali hafi ekki getað séð um greiningarnar. Sam­komu­lag hafi síðan náðst í dag og eru vonir bundnar við að samningarnir verði undir­ritaðir bráð­lega.

Að sögn Kristjáns hefur málið tafist meðal annars vegna heims­far­aldurs CO­VID-19. Meðal þess sem kveðið er á um í samningnum eru sjálf­töku­próf kvenna og að skimaðir verði endur­gjalds­lausar. Þá er gert ráð fyrir að bið­tími eftir niður­stöðum muni styttast.

„Þegar þessir samningar eru í höfn og þetta er komið í þann far­veg sem við viljum þá verða flestar konur búnar að fá svar innan við tíu vikum eftir að sýnið var tekið,” sagði Kristján í við­tali við Stöð 2.