Frumvarp um lækkun kosningaaldurs frá 18 ára í 16 ára hefur verið lagt fram á Alþingi aftur. Andrés Ingi Jónsson er fyrsti flutningsmaður málsins, en auk hans flytja málið tíu þingmenn úr Viðreisn, Pírötum, Samfylkingu og þingmaður utan flokka.

Þetta mál er ekki nýtt af nálinni. Lækkun kosningaaldurs hefur verið til umræðu á vettvangi Alþingis síðastliðin 13 ár, frá því að Hlynur Hallsson og Kolbrún Halldórsdóttir lögðu fram tillögu þess efnis, og síðan hafa frumvörp sem miða að lækkun kosningaaldurs verið lögð fram í ólíkum myndum en ekki náð fram að ganga.

Þetta skiptið er lagt til að breytingar verði gerðar á stjórnarskrá, sem hefði áhrif á kosningaaldur í öllum kosningum, en síðast þegar sambærilegt mál var lagt fram snéri það eingöngu að sveitarstjórnarkosningum.

Frumvarpið er hugsað til að styrkja lýðræðið með því að bregðast við aukinni kröfu ungs fólks um að hafa tækifæri til að taka virkan þátt í mótun samfélagsins. Rödd ungu kynslóðarinnar er sjálfsagður og ómissandi þáttur í því að bæta lífið í landinu, og með lækkun kosningaaldurs getur stærri hópur ungs fólks haft bein áhrif gegnum kosningar. Þetta myndi jafnframt auðga stjórnmálin með nýjum hugmyndum um leið og þjóðin er að eldast. Eða í stuttu máli: Fleiri og yngri kjósendur myndu gera samfélagið betra, " segir í tilkynningu frá Andrési Inga.

Frumvarpið í heild sinni má nálgast á vef Alþingis.