Tillagan sem meirihluti í skóla- og frí­stunda­ráði Reykja­víkur­borgar hefur lagt fram felur í sér að tveir skólar í norðanverðum Grafarvogi verði fyrir nemendur í 1.-7. bekk í Borgaskóla og Engjaskóla og einn sameiginlegur nýsköpunarskóli, Víkurskóli, verði fyrir nemendur á unglingastigi í 8.- 10. bekk. Í hverjum skóla yrðu um 260-270 nemendur.

Segir í tilkynningu að skólahald í Korpu leggist af með öllu en nemendum verði boðin skólavist í Engjaskóla, þar sem öll yngri skólabörnin úr Staðahverfi sameinast, og verði þeim tryggður skólaakstur eða strætókort til frjálsra afnota. Nái fjöldi nemenda í Staðarhverfi á aldrinum 6-12 ára tölunni 150 verði skólahald í Korpuskóla hafið á ný.

„Staðreyndin er sú að nemendum í Korpu hefur fækkað verulega undanfarinn áratug. Þar eru nú einungis 59 börn og hefur fækkað um meira en helming á síðastliðnum sjö árum. Börn í hverjum árgangi eru allt niður í fjögur talsins og það er ávísun á verri aðbúnað en við viljum bjóða okkar nemendum bæði námslega og félagslega. Meginatriðið er að geta boðið nemendum meiri fjölbreytni í námi og ekki síður félagslega, þ.e. að börnin hafi gott val þegar kemur að vinasamböndum og félagslegum tengslum,“ segir Skúli Helgason, formaður Skóla- og frístundaráðs Reykjavíkurborgar.

Skilyrði að ráðast í samgöngubætur á göngu- og hjólaleiðum í Staðarhverfi

„Unnið hefur verið gott starf á báðum starfsstöðvum Kelduskóla, í Vík og á Korpu, og við gerum okkur fulla grein fyrir því að tillaga okkar hefur áhrif á börnin í Staðarhverfi og fjölskyldur þeirra. Þess vegna er skilyrði að ráðist verði í ákveðnar samgöngubætur til að bæta göngu- og hjólaleiðir og almenningssamgöngur.  Meginatriðið er hinsvegar að geta boðið nemendum meiri fjölbreytni í námi og félagsstarfi. Eitt af því sem skiptir miklu máli eru stærðir nemendahópa. Við trúum því að þessi tillaga muni skila sér í bættri menntun og velferð nemenda þó að aðeins lengra verði að fara í skólann en því verður mætt með skólaakstri og samgöngubótum. Svo verður mjög spennandi að þróa áfram öflugan nýsköpunarskóla á unglingastigi í þessu góða hverfi,” segir Skúli.

Áætlað er að fjárhagslegur ávinningur af þessari breytingu á skóla- og frístundastarfi í norðanverðum Grafarvogi frá og með skólaárinu 2020-2021 nemi um 200 milljónum á ári. Á móti kemur að  fyrirhugað er að ráðast í samgöngubætur í hverfinu til að auka umferðaröryggi gangandi og hjólandi vegfarenda og bæta þjónustu Strætó.