Erlendur karlmaður sem handtekinn var í Þorlákshöfn að kvöldi síðastliðins sunnudags, og úrskurðaður í gæsluvarðhald þar til í dag, var látinn laus að lokinni yfirheyrslu upp úr klukkan tvö í dag.

Í tilkynningu frá lögreglu segir að ekki hafi þótt ástæða til að hafa hann í haldi lengur. Maðurinn hefur neitað sök.

Konan sem hann er talinn hafa stungið með hníf hefur verið útskrifuð af sjúkrahúsi og dvelur nú hjá venslafólki. Rannsókn málsins mun nú halda áfram, að sögn lögreglu, með úrvinnslu gagna þess.