Landsréttur staðfesti í dag niðurstöðu Héraðsdóms Reykjavíkur í máli fjögurra þingmanna Miðflokksins gegn Báru Halldórsdóttur vegna hins margumtalaða Klaustursmáls. Það var Stundin sem greindi fyrst frá en Ragnar Aðalsteinsson, annar lögmanna Báru, staðfestir úrskurð Landsréttar í samtali við Fréttablaðið.

Að auki voru kærendurnir, sem áfrýjuðu niðurstöðunni úr héraði, dæmdir til að greiða Báru 300 þúsund krónur í málskostnað. Þau Sigmundur Davíð Gunnlaugsson, Gunnar Bragi Sveinsson, Bergþór Ólason og Anna Kolbrún Árnadóttir, höfðu farið fram á að ráðist yrði í gagnaöflun og vitnaleiðslur fyrir héraðsdómi í desember. 

Kröfu fjórmenninganna var hafnað í Héraðsdómi Reykjavíkur þann 19. desember en þingmennirnir áfrýjuðu málinu til Landsréttar líkt og fyrr segir. Enn liggur þó ekki fyrir hvort þingmennirnir fjórir, eða hluti þeirra, hyggist leggja fram ákæru á hendur Báru. Sigmundur Davíð hefur gagnrýnt upptökurnar harðlega og segir að ráðist hafi verið á friðhelgi einkalífs þingmannanna.

Fréttin hefur verið uppfærð.