Líkt og greint var frá á fimmtudaginn var ákveðið að fresta tímabundið bólusetningum með bóluefni AstraZeneca hérlendis og víðar. Ákvörðunin var tekin í varúðarskyni á meðan Lyfjastofnun Evrópu fjallar um möguleg tengsl bólusetningar með bóluefni AstraZeneca við blóðtappa.

Til stóð að bólusetja starfsmenn Landspítalans, bæði á föstudag og í dag, en hefur því nú verið frestað um óákveðin tíma.

Í tilkynningu frá Landspítala kemur fram að spítalinn hafi ekki fengið úthlutað AstraZeneca-bóluefni úr þeirri lotu sem tengd er mögulegri aukaverkun.

Enginn hefur verið fullbólusettur með bóluefni AstraZeneca hérlendis en 9.267 einstaklingar hafa fengið fyrri sprautuna. Lyfjastofnun hefur alls borist 152 tilkynningar um aukaverkanir í kjölfar bólusetningar með efninu, þar af eru fjórar alvarlegar.

Ávinningurinn meiri en áhættan

Sérfræðinganefnd Lyfjastofnunar Evrópu (EMA) um eftirlit með ávinningi og áhættu lyfja (PRAC) hefur nú til skoðunar tilfelli blóðtappamyndunar í kjölfar bólusetningar með bóluefni AstraZeneca. Sem stendur er ekkert sem bendir til þess að notkun bóluefnis AstraZeneca hafi valdið myndun blóðtappa hjá bólusettum einstaklingum. Mat PRAC er að ávinningur af notkun bóluefnisins sé meiri en áhættan sem henni fylgir.

Samkvæmt frétt frá EMA er fjöldi tilkynninga um blóðtappamyndun ekki umfram það sem búast má við í venjulegu árferði hjá þeim fjölda sem hefur verið bólusettur. Daginn áður en ákveðið var að hætta tímabundið að bólusetja með bóluefni AstraZeneca hérlendis, höfðu 30 tilfelli blóðtappamyndunar verið tilkynnt í kjölfar bólusetningar á u.þ.b. 5 milljón manns á EES svæðinu með bóluefni AstraZeneca.

Samkvæmt Lyfjastofnun hafa þrjár tilkynningar á Íslandi borist um myndun blóðtappa í kjölfar bólusetningar gegn COVID-19. Er um að ræða eina tilkynningu fyrir hvert bóluefni sem notað hefur verið hérlendis (Comirnaty frá Pfizer/BioNTech, Covid-19 Vaccine Moderna og COVID-19 Vaccine AstraZeneca).