Landsbankinn hefur varað viðskiptavini sína við svikurum sem hafa sett upp falsaða innskráningarsíðu fyrir netbanka Landsbankans.

„Við vörum við svikum sem hafa átt sér stað í nafni Landsbankans og ítrekum að aldrei skal staðfesta millifærslu nema þú ætlir þér raunverulega að millifæra,“ segir í tilkynningu frá bankanum.

Í tilkynningunni einnig fram að um sé að ræða netsvik þar sem fólk er lokkað inn á falsaða innskráningarsíðu fyrir netbanka Landsbankans.

Í einhverjum tilvikum slógu viðskiptavinir inn notendanafn og lykilorð, netþrjótarnir eru þá komnir með þessar upplýsingar. Í kjölfarið fengu þessir viðskiptavinir beiðni frá svikurunum að auðkenna sig með leyninúmeri.

Þessar upplýsingar nægja þó ekki til að svikararnir geti skráð sig inn í netbankann, appið eða millifært heldur verður að staðfesta innskráningu og/eða millifærslu með því að veita samþykki, til dæmis því að slá inn auðkenningarnúmer sem berst með SMS.

Landsbankinn ítrekar því eftirfarandi:

  • Aldrei samþykkja innskráningu, millifærslu eða aðrar aðgerðir í netbanka/appi nema þú sért raunverulega að framkvæma þessar aðgerðir.
  • Ekki samþykkja innskráningu með rafrænum skilríkjum nema þú sért í raun og veru að nota þau til að skrá þig inn.
  • Óvíst er hvort hægt sé að endurheimta fé sem tapast með þessum hætti og þá getur þú setið uppi með tjónið.
  • Við sendum þér aldrei hlekki sem leiða þig inn á innskráningarsíðu netbankans eða appsins. Farðu alltaf inn á vefinn okkar eftir hefðbundinni leið – www.landsbankinn.is – til að skrá þig inn í netbankann.
  • Viðskiptavinir sem hafa skráð inn upplýsingar á svikasíðu þurfa strax að skipta um lykilorð inn í netbankann/appið og leyninúmer á reikningum.
  • Við mælum með að þú kynnir þér netöryggismál og varnir gegn netsvikum á landsbankinn.is/netoryggi.

Hvað á ég að gera ef ég verð þolandi svika?

  • Hafðu samband við okkur sem fyrst í síma 410 4000, með tölvupósti á landsbankinn@landsbankinn.is eða á netspjalli.
  • Ef kortinu eða kortanúmerinu þínu er stolið getur þú fryst það strax í Landsbankaappinu.
  • Utan afgreiðslutíma banka getur þú hringt í neyðarnúmer kortafyrirtækja. Neyðarnúmer Valitors, sem gefur út Visa-kort, er 525 2000.
  • Þú getur tilkynnt lögreglu um svikin með því að senda tölvupóst í netfangið cybercrime@lrh.is.