Í dag er spáð sunnan 8 til 15 metrum á sekúndum og skúrum, en rigningu sunnanlands síðdegis. Þá er lengst af þurrt og bjart á norðaustanverðu landinu.

Fram kemur í hugleiðingum veðurfræðings Veðurstofu Íslands að næsta lægð kemur inn á Grænlandshaf seinnipartinn og færist þá úrkomubakki inn yfir sunnanvert landið með samfelldri rigningu.

Í fyrramálið verður lægðin skammt vestur af landinu. Þá verður áttin suðlæg eða breytileg, kaldi eða strekkingur og allvíða talsverð rigning, en um og eftir hádegi dregur úr úrkomuákefðinni.

Síðdegis verður orðið þurrt að mestu á Austurlandi og þá bætir í vind við suðausturströndina

Veðurhorfur á landinu næstu daga

Á þriðjudag:

Suðlæg átt 5-13 m/s og allvíða talsverð rigning um morguninn, en væta með köflum eftir hádegi. Úrkomulítið á Austurlandi seinnipartinn og gengur í suðvestan 10-18 við suðausturströndina. Hiti 10 til 19 stig, hlýjast austantil.

Á miðvikudag:

Vestlæg eða breytileg átt 5-13 og skúrir, en rigning norðvestanlands fram eftir morgni. Suðvestan 8-15 og bjartviðri á suðaustanverðu landinu. Hiti 7 til 16 stig, mildast austanlands. Lægir um kvöldið.

Á fimmtudag:

Suðvestlæg eða breytileg átt 3-10 og skúrir. Hiti 8 til 14 stig.

Á föstudag:

Breytileg átt og rigning, en dregur úr vætu eftir hádegi. Hiti breytist lítið.

Á laugardag og sunnudag:

Suðlæg eða breytileg átt og væta með köflum, en lengst af þurrt austanlands. Hiti áfram svipaður.