Allar Boeing 737 MAX 8 og 9 flugvélar verða kyrrsettar í það minnsta þar til í maí, samkvæmt upplýsingum frá bandarískum flugmálayfirvöldum, FAA. BBC greinir frá.

Fjöldi flugfélaga og flugmálayfirvalda, þar á meðal Icelandair, hafa kyrrsett eða tekið vélarnar tímabundið úr rekstri. Ástæðan er mannskætt flugslys sem átti sér stað í Eþíópíu um helgina þegar vél af sömu tegund fórst. 157 létust í slysinu. Um er að ræða annað flugslys 737 MAX 8 vélar á innan við hálfu ári. Í októberlok fórst vél flugfélagsins Lion Air yfir Indónesíu með þeim afleiðingum að 189 létust.

Samkvæmt FAA fara vélarnar ekki aftur í loftið fyrr en þær hafa verið uppfærðar og búið er að reyna á öryggi þeirra. 

Þrátt fyrir flugslysin og eftirmála þeirra hefur flugvélaframleiðandinn Boeing ákveðið að halda áfram að framleiða flugvélarnar. Fyrirtækið hefur hins vegar stöðvað tímabundið afgreiðslu á slíkum vélum til flugfélaganna tímabundið. „Við ætlum að stöðva afgreiðslu á 737 MAX vélunum þar til við finnum lausn,“ er haft eftir talsmanni félagsins í frétt AFP.