Landsréttur lækkaði í dag dóm Héraðsdóms Reykjaness yfir Þorsteini Halldórssyni, úr sjö ára fangelsi í fimm og hálfs árs. Þorsteinn var í maí í fyrra dæmdur í sjö ára fangelsi fyrir ítrekuð kynferðisbrot gegn ungum pilti og fyrir að hafa tælt hann með gjöfum, fíkniefnum og peningum.

Dómur var kveðinn upp í Landsrétti nú klukkan 14 en niðurstöðuna staðfestir Guðmundur St. Ragnarsson, verjandi Þorsteins, í samtali við Fréttablaðið. Þorsteinn var tvívegis ákærður vegna málsins í fyrra og því ákveðið að sameina málin fyrir dómi.

Í dómi Héraðsdóms Reykjaness frá því í fyrra segir að Þorsteinn hafi „verið fundinn sekur um gróf og langvarandi kynferðisbrot gegn brotaþola, sem þá var barn á viðkvæmu þroska- og mótunarskeiði, auk brota á nálgunarbanni“. Drengurinn var á aldrinum 15 til 18 ára þegar brotin áttu sér stað.

Dómarinn sagði að Þorsteinn hafi nýtt sér yfirburði sína vegna aldurs- og þroskamunar og tælt piltinn til kynferðismaka með peningum og öðrum gjöfum, auk fíkniefna og lyfja. Var hann sakfelldur fyrir að hafa í þrígang nauðgað piltinum sem átti sér enga vörn undir áhrifum fíkniefna og lyfja.

Brotin hafi verið til þess fallin að valda piltinum andlegri vanlíðan. Hann hafi verið 15 ára og Þorsteinn 54 ára þegar brotin hófust. Pilturinn kvaðst fyrir héraðsdómi hafa ánetjast sterkum fíkniefnum sem Þorsteinn gaf honum í skiptum fyrir kynmök. Sagðist drengurinn af þessum sökum vera fíkill.