Enn er mark­tækur munur á launum karla og kvenna þrátt fyrir að dregið hafi úr launa­mun síðustu ára­tugi. Þetta er meðal þess sem kemur fram í nýrri rann­sókn á launa­mun kynjanna sem Katrín Jakobs­dóttir, for­sætis­ráð­herra, kynnti á ríkis­stjórnar­fundi í morgun.

Frá árinu 2008 til 2020 minnkaði munur á at­vinnu­tekjum karla og kvenna úr 36,3 prósentum í 23,5. Þá minnkaði ó­leið­réttur launa­munur úr 20,5 prósentum í 12,6 og leið­réttur launa­munur úr 6,4 prósentum í 4,1. Leið­réttur launa­munur sýnir hvort karlar og konur með sömu eigin­leika eða þætti fái sam­bæri­leg laun.

Í skýrslunni segir einnig að kyn­bundin skipting í störf og at­vinnu­greinar skýri að miklu leyti þann launa­mun sem er til staðar. Lýð­fræði­legir þættir og á­hrif menntunar­stigs á launa­mun hafi minnkað, þá sér í lagi síðustu ár.

Katrín segir á Face­book-síðu sinni að þetta sýni að að­gerðir stjórn­valda skipti máli. Það standi þó eftir að vinna á þeim launa­mun sem skýrist af kyn­skiptum vinnu­markaði og ó­líku mati á virði starfa. Í fyrra hafi hún skipað starfs­hóp til að koma með til­lögur að að­gerðum til að út­rýma launa­mun sem skýrist af kyn­skiptum vinnu­markaði og leið­rétta van­mat á kvenna­störfum. „Til að fylgja þeim til­lögum eftir mun ég á næstu dögum skipa að­gerða­hóp um launa­jafn­rétti og jafn­rétti á vinnu­markaði því bar­áttunni er ekki lokið,“ segir Katrín.