Daníel Indriðason, 14 ára, var greindur með kvíðakast á heilsugæslunni á mánudag og var honum sagt að fara heim að hvíla sig. Foreldrar hans, Indriði Björnsson og Rikke Pedersen, fóru með hann á Barnaspítalann á þriðjudagsmorgni þar sem blóðtappar í báðum lungum drengsins komu í ljós.

„Þeir sögðu að þetta væri mjög alvarlegt ástand,“ segir Indriði.

Daníel var búinn að vera í tíu daga einangrun vegna Covid-19 smits og á leið í skólann þegar hann fékk skyndilega yfirliðstilfinningu. Hann átti erfitt með andardrátt, varð fjólublár og fannst hann vera að missa mátt í fótum.

Daníel fór rakleiðis heim til sín þar sem foreldrar hans, Indriði og Rikke, höfðu samband við Covid-19 deildina. Þeim var sagt að hafa samband við heilsugæsluna, sem þau gerðu.

Þar var hann skoðaður vel og að endingu var talið að um kvíðakast væri að ræða og drengurinn sendur heim. Eftir því sem leið á daginn varð hann móðari og átti erfitt með að koma út úr sér heilli setningu að sögn Indriða.

Móðir hans fór þá að fylgjast grannt með honum ásamt því að mæla hitastig hans reglulega. Þá tók hún eftir því að hitastigið rokkaði upp og niður. Morguninn eftir, á þriðjudegi, hafði hún samband við Barnaspítalann sem vildi fá að skoða Daníel.

Indriði segir að eftir myndatöku hafi blóðtapparnir fundist. Hann þurfti ekki að fara á gjörgæslu.

„Maður veit náttúrulega ekkert hvernig þetta hefði endað ef maður hefði trúað því að þetta væri bara kvíðakast,“ segir Indriði.

Daníel útskrifaðist af Barnaspítala Hringsins í gær og braggast vel. Indriði segir að nú taki við þriggja mánaða lyfjainntaka og eftirfylgni.

Daníel er hvorki með neina undirliggjandi sjúkdóma né í áhættuhópi.

„Þetta er greinilega eitthvað sem foreldrar þurfa að hafa í huga,“ segir Indriði og nefnir að þetta sé þekkt aukaverkun hjá eldra fólki en ekki ungu fólki.