Kaupfélag Skagfirðinga hefur fest kaup á matvælafyrirtækinu Gunnars ehf. í Hafnarfirði.

Gunnars er þekktast fyrir majónesið sem kennt er við fyrirtækið. Félagið var upphaflega stofnað árið 1960 af hjónunum Gunnari Jónssyni og Sigríði Regínu Waage undir nafninu Gunnars majones.

Árið 2014 var félagið lýst gjaldþrota, en skömmu áður keypti Kleópatra Kristbjörg vörumerki Gunnars, uppskriftir, heimasíðu, markaðsefni og búnað félagsins af dætrum stofnendanna, Helenu og Nancy Gunnarsdætrum. Í dag starfa um 20 manns hjá Gunnars.

Undanfarnar vikur hefur Gunnars verið í söluferli og Fréttablaðið hefur heimildir fyrir því að búið sé að undirrita kaupsamning milli Kaupfélags Skagfirðinga og Kleópötru Kristbjargar um sölu á félaginu.

Kaupin eru háð samþykki Samkeppniseftirlitsins og meðan á því ferli stendur fer lögmannsstofan Sæver Þór & Partners með umsjón með rekstri Gunnars, en stofan annaðist söluna.

Sævar Þór Jónsson lögmaður, sem annast rekstur Gunnars meðan á þessu ferli stendur, staðfesti í samtali við Fréttablaðið að hreyfing væri komin á söluna en vildi ekki staðfesta að kaupin væru frágengin eða hver kaupandinn væri.

Kaupfélag Skagfirðinga er umsvifamikið í matvælaframleiðslu hér á landi og er meðal annars næst stærsti hluthafinn í Mjólkursamsölunni.