„Annað hvort var þetta bein aðgerð af hálfu rússneska ríkisins gegn okkar eigin landi, eða rússnesk yfirvöld hafa misst stjórn á taugaefni sem gæti valdið stórslysi og leyft því að enda í klóm annarra,“ sagði Theresa May, forsætisráðherra Bretlands, í dag. May hélt í dag ræðu um mál fyrrverandi njósnarans Sergei Skripal sem eitrað var fyrir sunnudaginn 4 mars. BBC greinir frá. 

Skripal og 33 ára dóttir hans Yulia fundust meðvitundarlaus á bekk og var í fyrstu óvíst hvað komið hefði fyrir. Síðar kom í ljós að eitrað hefði verið fyrir þeim með stórhættulegu taugaeitri sem bresk stjórnvöld hafa nú sagt að hafi verið þróað í Rússlandi. May sagði í ræðu sinni í dag að Bretland yrði að vera tilbúið til þess að leggjast í stórtækar aðgerðir vegna málsins ef að Rússar hafa ekki gefið almenileg svör fyrir miðvikudaginn næstkomandi.

Feðginin eru enn á gjörgæslu eftir árásina. Skripal var dæmdur í þrettán ára fangelsi í Rússlandi fyrir að njósna um landa sína fyrir Breta. Honum var sleppt árið 2010  veitt hæli í Bretlandi.