Berglind Hreiðarsdóttir matarbloggari töfrar fram einfalda og góða rétti fyrir kosningavökuna í kvöld. Fréttablaðið/Valli

Einn vinsælasti matarbloggari landsins, Berglind Hreiðarsdóttir sem heldur úti síðunni gotteri.is, situr sjaldnast auðum höndum og bíður nú eftir að nýjasta bókin hennar, Börnin baka, sem hún gerði ásamt dóttur sinni, komi til landsins og í verslanir. Berglind taldi það þó ekki eftir sér að gefa landsmönnum nokkrar góðar uppskriftir fyrir kosningapartíið í kvöld.

Fersk nachosídýfa

Nachos-dýfur eru gríðarvinsælar í veislur en þessi er ferskari en þær flestar. Mynd/Aðsend

  • 1 lítil krukka salsasósa (um 300 g)
  • 400 g rjómaostur
  • 1 rauðlaukur
  • Iceberg (c.a ¼ haus eftir stærð)
  • 1 x rauð paprika
  • ½ púrrulaukur
  • Mini tómatar og nokkrir hringir af blaðlauk til skrauts
  • Nachosflögur
  1. Saxið rauðlauk mjög smátt og dreifið í botninn á þeirri skál/fati/bakka sem verður fyrir valinu.
  2. Setjið salsasósu og rjómaost í hrærivélarskálina og blandið þar til kekkjalaust og létt í sér.
  3. Smyrjið rjómaostblöndunni yfir rauðlaukinn.
  4. Saxið grænmetið smátt (nema tómata) og dreifið yfir blönduna (að sjálfsögðu má nota annað grænmeti, bara það sem ykkur þykir gott).
  5. Skerið nokkra kirsuberjatómata niður og skreytið með þeim og heilum hringjum af blaðlauk.
  6. Gott er að kæla nachosdýfuna aðeins áður en hennar er notið með stökkum nachosflögum en þó ekki nauðsynlegt.

Ostasalat og snakk

Hið klassíska ostasalat klikkar aldrei. Mynd/Aðsend
  • 1 x Hvítlauks kryddostur
  • 1 x Mexíkó kryddostur
  • 1 rauð paprika
  • 4 vorlaukar
  • 15-20 rauð vínber
  • 180 g (ein dós) sýrður rjómi
  • 100 g majónes
  • ½ tsk. salt
  • ¼ tsk. pipar
  • Finn Crisp snakk

  1. Skerið ostana niður í litla teninga og setjið í skál.
  2. Saxið papriku og vorlauk smátt og skerið vínberin í 4 hluta og hellið í skálina.
  3. Setjið að lokum sýrðan rjóma, majónes og krydd í skálina og blandið öllu varlega saman.
  4. Njótið með Finn Crisp snakki.

Bakaður ostur með grilluðum paprikum og pestó

Bakaður ostur, verður ekki einfaldara, né betra. Mynd/Aðsend

  • 1 x Dala Auður
  • 3 msk. Sacla pestó með „Roasted pepper“
  • Sacla Peperoni grigliati (grillaðar paprikur í olíu)
  • Furuhnetur
  • Fersk basilíka
  • Meðlæti: Baguette, kex, hnetur, hráskinka, vínber eða annað sem ykkur dettur í hug.
  1. Takið ostinn úr umbúðunum og leggið í eldfast mót eða á bökunarpappír.
  2. Setjið vel af pestó ofan á hann, skerið grillaðar paprikur niður og setjið þar næst ásamt furuhnetum.
  3. Bakið við 190°C í um 10 mínútur.
  4. Stráið smá ferskri basilíku yfir og berið fram með góðu brauði, kexi og öðru meðlæti.

Beikon og laukídýfa

Heimatilbúin beikonídýfa er sannarlega eitthvað annað og meira. Mynd/Aðsend

  • 100 g beikon
  • 2 laukar
  • 3 msk. ólífuolía
  • 2 msk. sykur
  • 220 g Philadelphia rjómaostur
  • 150 g sýrður rjómi
  • 90 g rifinn cheddar ostur
  • 2 stk smátt saxaður vorlaukur
  • Salt og pipar
  1. Eldið beikonið þar til það er vel stökkt og myljið/saxið niður.
  2. Skerið laukinn í ræmur og steikið upp úr ólífuolíu og sykri við meðallágan hita í um 20-30 mínútur þar til hann er mjúkur í gegn, kryddið til með salti og pipar. Saxið hann þá smátt niður og geymið.
  3. Hrærið rjómaosti og sýrðum rjóma saman í skál og bætið þá restinni af hráefnunum saman við og blandið vel.
  4. Berið fram með Maarud snakki með salti og pipar.