Körfuboltastelpur í KR hafa hvorki fengið bætur, né heyrt aftur frá Sjálfstæðisflokknum þrátt fyrir loforð flokksins um að greiða þeim fyrir tap í veitingasölu á körfuboltamóti yngri flokka fyrr í mánuðinum.

Um fjáröflun fyrir stelpurnar var að ræða vegna æfingaferðar til Bandaríkjanna í sumar. Það spillti hins vegar fyrir veitingasölunni að Sjálfstæðisflokkurinn mætti á svæðið og grillaði frelsis­borgara fyrir áhorfendur. Flokkurinn lofaði í kjölfarið að tjón stelpnanna vegna þessa yrði bætt.

„Við erum núna að hlaupa sveitt út um allan bæ að reyna að fjárafla þessa ferð,“ segir Stein­grímur Óli Einars­son, meðlimur í foreldrafélagi körfuboltastelpnanna.

Steingrímur segist ekki hafa náð sambandi við fulltrúa Sjálfstæðisflokksins eftir að loforð um bætur var gefið en það hafi gerst á bílaplaninun við KR heimilið eftir að frelsis­borgara­bíllinn hafi mætt á staðinn. „Það var bara eftir þetta sam­tal á bíla­planinu,“ segir hann.

Á­kveðið hafi verið að Sandra Hlíf O­cares, sem skipaði 8. sæti hjá Sjálf­stæðis­flokknum í borginni, yrði tengi­liður flokksins við for­eldra­fé­lagið. For­eldra­fé­lagið hefur, að sögn Stein­gríms, ekki heyrt í henni síðan flokkurinn grillaði ham­borgarana.

„Það var sendur tölvu­póstur á hana tólfta þessa mánaðar og honum var ekki svarað, ekki einu sinni stað­festing á mót­töku,“ segir Stein­grímur og bætir við að hún hafi einnig hunsað skila­boð á Face­book.

Sandra kannast ekki við að hafa fengið fyrirspurn

Sandra Hlíf Ocares skipaði 8. sæti Sjálfstæðisflokksins í Reykjavík fyrir borgarstjórnarkosningarnar.
Fréttablaðið/Valli

„Ég hef ekki fengið neina fyrirspurn. Við vorum að klára kosningar og þetta er eitt af málunum sem við þurfum að ganga frá," segi Sandra í samtali við Fréttablaðið. Hún segir Sjálfstæðisflokkinn hafa langan lista af málum sem þau hafa þurft að klára eftir kosningarnar og þetta sé eitt af þeim.

Segir tapið hlaupa á tugum þúsunda

Stelpurnar eru að fara í æfingaferð til Fíladelfíu í Bandaríkjunum í sumar og veitingasalan við KR heimilið var hluti fjáröflunar fyrir þá ferð. Steingrímur segir verulega muna um það fé sem fór forgörðum umræddan dag. Aðspurður segir hann að um tugi þúsunda sé að ræða.

Bjarni Guð­jóns­son, fram­kvæmda­stjóri KR, stað­festi við Frétta­blaðið fyrr í þessum mánuði að hann hafi leyft Sjálf­stæðis­flokknum að mæta. Stein­grímur segir fram­kvæmda­stjórnina ekki hafa upp­lýst for­eldra­fé­lagið um það. „Við sjáum bílinn bara rúlla inn á plan þegar það er að detta í há­degis­sölu hjá okkur,“ segir hann.

„Þetta virðist vera bara sú hryggðar­mynd stjórn­mála­manna að skreyta sig með skraut­fjöðrum í kosninga­bar­áttu sem eru síðan allar foknar út í veður og vind að kosningum loknum“, segir Stein­grímur.