Matvælastofnun hefur nú tekið sýni á öllum níu minkabúum landsins vegna kórónaveirunnar og reyndust þau öll neikvæð.

Ákveðið var að ráðast í sýnatökuna eftir að stökkbreytt afbrigði kórónaveiru greindist í minkum á 207 búum í Danmörku.

Matvælastofnun hefur fyrirskipað hertar sóttvarnir á minkabúum hér á landi og hyggst vera með reglubundnar sýnatökur á öllum búum í vetur.

Auk þess verða starfsmenn minkabúa skimaðir samkvæmt fyrirmælum sóttvarnalæknis. Frá þessu er greint á vef stofnunarinnar.

Tóku sýni úr dauðum minkum

Sýnin voru tekin úr dauðum minkum sem lógað var vegna árvissrar pelsunar. Voru sýnin send í greiningu á Tilraunastöð Háskóla Íslands í meinafræði á Keldum og hjá Íslenskri erfðagreiningu.

Þegar pelsun lýkur á minkabúum hefur minkastofn landsins að sögn Matvælastofnunar minnkað um 15 þúsund lífdýr sem bíða fram á vorið eftir að pörun hefjist.

Minkarnir í Fjölskyldu- og húsdýragarðinum ekki til sýnis

Atvinnuvega- og nýsköpunarráðuneytið hefur fyrirskipað hertar sóttvarnaraðgerðir á minkabúum, samkvæmt tillögu Matvælastofnunar.

Markmið aðgerðanna er að verja minka fyrir smiti með kórónaveirunni sem veldur COVID-19.

Í þeim felast meðal annars hertar kröfur um persónulegar sóttvarnir starfsmanna, auk banns á flutningi lifandi minka og ónauðsynlegum heimsóknum í minkahús.

Einnig verður sýningahald með minka bannað og því verða minkarnir í Fjölskyldu- og húsdýragarðinum í Reykjavík ekki til sýnis á opnunartíma garðsins.